KUCHING: Komiti Penyangga Penusah Nengeri Sarawak (JPBNS) ari renggat bagi menua nyentuk pelilih sereta agensi perintah nengeri ti bekaul diansak besikap napi bah berindik ari musin landas nuntung Sarawak.
Sapit Premier Sarawak ti mega Chairman JPBNS Datuk Amar Douglas Uggah Embas madah, nya dikena besikap napi penusah bah ti suah nyadi Januari nyentuk Februari ketegal ujan enda ngetu.
“Kitai minta rayat ngadang lalu kitai mega minta sitak menua ulu nengah Raban Ngesah Penusah Komuniti (CERT) sama besikap ba menua ti jauh ke alai agensi perintah enda ulih datai ba maya penusah nuntung, kitai ngasuh sida nentuka pengawa ngidupka nyawa dipejalai lengkas.
"Semua opis mega sedia meri bantu nyengkaum Opis Pengintu Pengelantang Mensia Mayuh (JKM) ti nyendiaka pemakai enggau kereban diguna nentuka orang tasah bah diau lantang ba Palan Ngenduh (PPS)," ku iya.
Iya nyebut pekara nya lebuh dirandau pemberita rambau ngabas PPS Balai Komuniti Stapok, Batu Kawa kena Hari Tiga.
Datuk Amar Douglas mega ngelalau orang tasah bah pindah enti diasuh ungkup pemaik enggau pengelantang sida dikena nyeliah penusah bukai nyadi.
Iya madah, semua peranak ti diau ba menua mudah ampuh mega diasuh ngadang sebarang penusah ti tau nyadi ketegal gaya hari enda manah.
Ngenang pasal Pengkalan Operasyen Terabai Menua (FOB), Datuk Amar Douglas nerang, Perintah Sarawak udah nyendiaka pengkalan bekal besai di Kota Samarahan enggau sekeda pengkalan mini ba sekeda endur.
Ku iya, perintah mega bisi pemekal ba tetiap pengkalan serata nengeri ngambi bekal ulih dianjung enti diguna.
“Kitai belajar ari utai ti nyadi taun nyin tadi, lebuh bah besai nuntung Bintulu nyentuk kitai betapi enggau penanggul nganjung tilam sereta utai diguna bukai.
“Nya alai, kitai ngarap ke gaya hari enda kelalu jai nyentuk ujan ba siti endur lalu ngasuh bah besai nyadi.
"Tang kitai besikap lalu udah ngelalau pemekal sedia ba sekeda endur nyengkaum menua pesisir di Sarawak," terang iya.
Nangkan nya, Datuk Amar Douglas madah, bisi dua PPS dibuka di Sarawak ketegal ujan enda ngetu kenyau ari demalam nyentuk sehari tu.
PPS dibuka iya nya PPS Dewan R-Piang, Kampung Sinar Budi Baru en 181 orang tasah ngenduh datai ari 44 ruang bilik sereta PPS Balai Komuniti Stapok ti diatu bisi 199 orang tasah bah datai ari 54 ruang bilik ngenduh dia.
Sama datai Sapit Sekretari Perintah Sarawak (Administrasyen) ti mega Sapit Chairman JPBNS Datu Buckland Bangik. -EDISI UKAS
