KUALA LUMPUR: Toh Puan Datuk Patinggi Fauziah Mohd Sanusi bejadi Pengerami Graduasyen enggau Ngelanchar Alumni Sekula Sekondari (SMK) Taman Melati ti diatur di Dewan Tun Hussein Onn, Pusat Dagangan Dunia Kuala Lumpur (WTCKL), kena Hari Enam.

Pengerami nya diatur kelai ngaku pemujur bala nembiak ti tembu sekula kelimpah myadi pelasar rasmi ngelanchar Alumni SMK Taman Melati dikena negap rentayan sukung entara sekula enggau ex- nembiak.

Penatai Toh Puan Datuk Patinggi Fauziah diambat Prinsipal SMK Taman Melati, Dzaizatul Shikin Madrahim; Tuai Gerempung Apai Indai enggau Pengajar (PIBG) SMK Taman Melati, Shahrizal Aman sereta Presiden Alumni SMK Taman Melati, Profesor Madya Dr. Mohd Shahnawi Mohmad Fairuz.

Bejaku bejadi pengerami nya, Toh Puan Datuk Patinggi Fauziah meri tabi puji ngagai bala graduet ke pemujur nembu siti renggat beguna ba pejalai pelajar sida.

Iya mega meri terima kasih ngagai raban sekula, bala pengajar enggau bala apai indai ke pemanah kerejasama sereta pengeran ngembing enggaunempa pemereti nembiak.

Ku iya, pengawa ngatur pengerami graduasyen ukai semina lambang pemujur akademik tang mega nyeremin pengeransing, disiplin sereta semangat bala nembiak napi pemar belajar.

Ngenang pasal pengawa ngelanchar Alumni SMK Taman Melati, iya andal ke pengawa numbuh rentayan Alumni ti berurun enggau aktif ulih nyadi aset strategik ngagai sekula nengah penau, peneleba sereta embing ngagai rebak dudi.

Kuiya, pemujur sesebengkah institusyen pelajar ukai semina disukat nengah pemujur akademik tang ditegap nengah kaul rat entara sekula, alumni enggau komuniti.

Nya alai, Toh Puan Datuk Patinggi Fauziah meri terima kasih ngagai semua raban bekaul ti ngemujur pengerami nya sereta ngarap bala graduet semampai mai nama sekula enggau penuh integriti sereta ngesan tanggungpengawa.