Kaban Parlimen Batang Lupar Mohammad Shafizan Kepli madah, pengawa ngatur pekit nya dikena ngempung tim bepekit, komuniti lokal sereta ngerapit kaul entara nembiak enggau raban veteran nengah aktiviti lumba ti manah ke pengerai.
“Ba padang kitai bepekit, ba luar kitai mengkang nyadi bakih enggau kaul kitai rat,” ku iya lebuh bejadi pengawa nutup pekit nya ba Dataran Temenggung Kadir, Beladin, ditu kena Hari Enam.
Mohammad Shafizan mega meri tabi puji ngagai semua raban ti bebendar ngemujur pekit nya seraya nyemetak madah ke program bepelasarka lumba patut diberi sukung meruan ke pengelantang komuniti.
Nambah ke nya, iya meransang komuniti datai ngagai Palan Servis Parlimen tauka Kunsil Nengeri (DUN) nyema bisi perambu ngatur program ngambi ulih diperati enggau dipejalai begulai.
Kaban Parlimen Batang Lupar nya mega ngarap raban nembiak ba sitak tu terus maju enggau mujur nengah chakah ngaul diri ba lumba nipak tanggungpengawa sida nyadi aset enggau tuai dudi hari.
Pekit ti belabuh diatur kenyau ari pun bulan Disember 2025 ngaul semilan tim ari Kuching, Sebuyau, Beladin, Pusa sereta genturung besemak.
Ba pekit nya, Armada FC nyadi champion ditangkan Snipper N29 ba penuduk kedua, Mix Hijiba FC ba penuduk ketiga enggau Kaslap FB ba penuduk keempat.
