Komuniti Melanau Miri Nemu Pemesai Reti Penyerakup Nengah Ngintu Pengerami
MIRI: Semangat beserakup, pengelantang enggau bemacham budaya terus ditegap nengah Pengerami Ngintu Krismas 2025 enggau Ngintu Taun Baru 2026 diatur Gerempung Melanau Miri (PMM) ti richah diatur ba Balai Balau, Wisma Melanau Miri, kena malam Hari Enam.
Pengerami nya richah enggau penatai bala tuai perintah nengeri enggau Perintah Besai baka Menteri Pengangkut Sarawak ti mega Kaban Kunsil Nengeri (ADUN) Senadin, Dato Sri Lee Kim Shin sereta Sapit Menteri Luar Nengeri Malaysia ti mega Kaban Parlimen Sibuti, Dato Lukanisman Awang Sauni.
Sama datai, Datuk Bandar Bandaraya Miri ti mega ADUN Pujut, Adam Yii Siew Sang; Sapit Datuk Bandar Bandaraya Miri, Ariffin Mohamad; Temenggong Abang Mohamed Dato’ Sri Abang Othman; Chairman Gerempung Melanau Miri, Abdullah Jaini; sereta Chairman Pengatur Pengerami, Boniface Bait.
Lebuh bejaku, Dato Sri Lee meri terima kasih ngagai Gerempung Melanau Miri laban ngatur pengerami ti nyeremin reti penyerakup, pengelantang enggau semangat begulai entara komuniti pupu bansa enggau jalai pengarap ba Miri.
Ku iya, pengerami ngintu Krismas enggau Taun Baru ukai semina pengerami pengarap tang mega nyadi lambang kasih sayau, pengelantang sereta begulai ti nyadi pugu peneguh sosial enggau pengelantang komuniti Sarawak.
Iya mega muji komuniti Melanau ti semampai regas nyungkak pemansang sosial, ekonomi enggau budaya nengeri kelebih agi ba Mengeri Miri.
Berebak enggau nya, ku iya, Perintah Sarawak keran nyaga pengelantang raban bansa nyadi pugu pemansang enggau pengelantang nengeri.
Berebak enggau nya, iya ngelalau rebak biak Melanau terus ngetan identiti enggau pesaka budaya nyengkaum jaku asal nengah pengawa ngena pelasar digital dikena ngelaku budaya ngagai rebak biak.
Ba pengerami nya, bisi mega diatur pengawa nyua Anugerah Nyulut Gerempung Melanau Sarawak (PPMS) ngagai Scolastica Antonia Steven ke pemujur bulih Degree Kejururawatan dengan Kepujian ari Universiti Malaysia Sarawak (UNIMAS).
Gerempung Melanau Miri mega nyua bantu pengelantang E-Kasih ngagai 10 penerima nyadi sebagi ari komitmen gerempung nya mantu kaban ti begunaka bantu.
Pengawa ditampung enggau bejadi Krismas, nyirap kek Taun Baru 2026, pengawa nyua tepa, begambar, makai lemai, karaoke sereta chabut tikit benasip ti nambah pengerichah.
Pengerami ninting taun tu mandang aspirasyen Gerempung Melanau Miri seraris enggau sulu jaku “Terus Maju” dikena negap penyerakup, nyaga pengelantang pupu bansa sereta nentuka komuniti Melanau terus relevan enggau regas ba arus pemansang Mengeri Miri enggau Sarawak.
