ASAJAYA: Pengerami Ambal Asajaya 2026 dipeda bisi pengulih besai diangkat nyadi produk dagang temuai komuniti meruan bepuguka budaya, rampa menua sereta pesaka pemakai asal ba Sarawak.

Menteri Dagang Temuai, Industri Kreatif enggau Seni Pemerindang Sarawak Dato Sri Abdul Karim Rahman Hamzah madah, pengerami nya diatur ukai semina nyaga pesaka budaya lokal tang mega nyadi penyungkak pemansang ekonomi komuniti lokal.

“Gempung elemen budaya, rampa menua, pejalai, pemakai enggau pengerami ngujungka Pengerami Ambal Asajaya nyadi pelasar meruan ti nyungkak pemansang sitak tu,” ku iya lebuh bejadi Pengawa Nangguh Pengerami Ambal Asajaya 2026 ti diatur ba Dataran Pekan Asajaya kena Hari Enam.

Iya mega meri terima kasih ngagai Kaunsil Mengeri Kota Samarahan (MPKS), Universiti Malaysia Sarawak (UNIMAS) enggau Opis Pelilih Asajaya ke pengeran enggau kerejasama strategik seraya nunjukka penau komuniti lokal ngatur pengerami besai.

Ku iya agi, pengawa ngatur pengerami tu ngemujur inisiatif perintah nengeri tu keran bejalaika mayuh projek pemansang ba Pelilih Asajaya nyerangkung ngemanah infrastruktur pemun, perengkaguna mensia mayuh, rentayan jalai sereta inisiatif sosioekonomi ke pengelantang komuniti.

Nangkan nya, Chairman Perbandaran Kaunsil Mengeri Kota Samarahan (MPKS), Abang Ismawi Abang Ali madah, Pengerami Ambal Asajaya 2026 diatur nyadi pelasar mandang identiti enggau penyelai lokal ngagai rebak biak sereta bala pengusung.

Ku iya, ambal ukai semina pemakai asal tang mega lambang begulai, kreativiti enggau penau lokal ti ditampung peranak Asajaya kenyau ari aki ini kelia.

Entara aktiviti diatur nyengkaum AmbalHunt, Amballicious, sukaneka rayat, pekit nyumai sereta ke bukai ti nunjukka semangat beripai enggau penyerakup komuniti.

Program AmbalHunt ngerikod 48 penyereta ngaul 13 tim ti mujur ngumpul ambal pemerat 53.05 kilogram, seraya Amballicious dipasuk 13 genturung ngelingi Asajaya, Moyan, Serpan enggau Sebandi.

Sukaneka rayat ngaul 60 penyereta nembiak mit ari sekeda librari dia. -EDISI UKAS