KUCHING: Sempun Lumba Malaysia (SUKMA) 2026 disua chara simbolik ari Sarawak ngagai Selangor ba siti pengawa ti richah enggau besai reti, ngempuru bala tuai nengeri, pegawai sereta maskot seraya ngelai tanggungpengawa belabuh diadu ungkup edisyen ke-22 lumba nya.
Pengawa ti diatur nya tampung ari aum pemberita serimbai penemuai basa deligit Exco Nembiak, Lumba enggau Dagang Nengeri Selangor kena Hari Tiga nya ngemata sempun SUKMA diidup begulai nyadi lambang tanggungpengawa begulai enggau penyerakup nasional.
Pengawa nya richah agi nerima penatai maskot Sarawak enggau Selangor ti narit ati enggau gaya ti nyelai, nyeremin semangat bebakih enggau belumba chara manah ti nyadi identiti SUKMA seraya nentuka pengawa rasmi nya siti pengerami visual lumba enggau nembiak ti ngembuan mayuh chura.
Menteri Nembiak, Lumba enggau Pemansang Orang Dagang Sarawak, Dato Sri Abdul Karim Rahman Hamzah madah, pengawa nyua sempun nya mai simbolik ti dalam, mandangka pengandal ngagai Selangor nyadi tuai rumah SUKMA XXII enggau PARA SUKMA ke deka datai.
Iya madah, Sarawak meruan nyukung kontinjen nengeri tu lalu terus negap inisiatif pemansang nembiak enggau lumba, seraya nyemetak madah ke SUKMA enggau PARA SUKMA udah nyadi pelasar beguna nempa rebak biak Malaysia ti disiplin, beretan enggau manah ulah.
Berebak enggau nya, penemuai basa sereta pengawa nyua simbolik nya nanggam kerejasama rat agi entara Sarawak enggau Selangor kelebih agi ba pemansang atlit, atur lumba, negap nembiak enggau pedagang nembiak.
Pengawa nyua simbolik nya kelai Selangor dilempai tanggungpengawa maya besikap ngatur SUKMA XXII ti mujur enggau inklusif sereta negap pengeran begulai kededua nengeri ba pemansang nembiak enggau lumba ba renggat nasional -EDISI UKAS
Pemberita : Mia Amira & Alezxandria Kapple
Gambar : Alezxandria Kapple
