KUCHING: Perintah Sarawak udah negap tikas besikap semua agensi enggau komiti penyangga penusah ba renggat bagi menua enggau pelilih ngadang bah besai agi berindik ari ujan bangat kandang dua ngagai tiga bulan deka datai.
Sapit Premier Sarawak ti mega Chairman Komiti Penyangga Penusah Nengeri Sarawak (JPBNS), Datuk Amar Douglas Uggah Embas madah, ari peneleba mutar bah pun minggu tu tadi udah meri ajar ti beguna, kelebih agi ari sukut ngatur Palan Pengenduh (PPS).
Ku iya, bisi 10 PPS udah dibuka di Kuching lebuh penusah bah nuntung lalu ari penusah nya, pengawa ngatur palan pengenduh ngemantup ati.
“Naka diatu, kitai chukup tepantup ati meda atur pengawa ba PPS di Kuching lebuh bah empai lama,” ku iya madah ngagai Unit Komunikasi Awam Sarawak (UKAS) pengudah betuaika Aum Komiti Penyangga Penusah Nengeri Sarawak di Wisma Bapa Malaysia, kena Hari Dua.
Sama datai, Sapit Sekretari Perintah Sarawak (Administraysen) Datu Felicia Tan Ya Hua, Sekretari Mendam Opis Menteri Infrastruktur enggau Pemansang Penyangkai Kapal (MIPD) Datuk Chiew Chee Yau, Direktor Unit Pengelikun enggau Penerit Adat Sarawak (UKPS) Abdul Wahab Rahim sereta bala tuai opis ke bukai.
Datuk Amar Douglas Uggah madah, entara pengawa ngemanah ti udah dikelala nyengkaum nyendia rintai pengawa ti berurun agi maya proses mindah sida ti tasah, nyendiaka bekal pemakai enggau utai diguna, beperesa pengerai ari opis perubat sereta kereja nagang denggi dipejalai raban bekuasa.
Iya mega madah, semua kereban enggau perengkaguna di PPS mega patut genap enggau meruan dikena nyamin pengelantang sida ti ngenduh dia.
“Tuju kitai nentuka PPS tu lantang. Orang tasah udah tusah, nya alai kitai enggai ke pengawa enda diatur meruan deka nanggul sida,” ku iya.
Datuk Amar Douglas Uggah mega ngelalau peranak ti menua ti suah ampuh seruran bejaga enggau ngasi ke gerah pindah ari raban bekuasa.
“Enti diasuh pindah, sida meseti pindah laban tuju kitai deka nentuka pengelikun sida,” ku iya nyemetak. - EDISI UKAS
