Kerejasama Perintah Sarawak-PETRONAS Negap Sistem Pengerai
KUCHING: Perintah Sarawak enggau Petroliam Nasional Berhad (PETRONAS) majak ke pengawa beberika bantu nyengkaum kereban berubat ngagai Klinik Pengerai Batu Kawa ba tuju nyaup nyungkak tikas pengidup enggau servis pengerai menua pesisir.
Pengawa nyuaka pemeri nya dikemataka Sapit Premier Sarawak Datuk Amar Profesor Dr Sim Kui Hian ba klinik nya, Hari Tiga.
Ba jaku iya, iya madah, pengawa nya kelai kerejasama strategik sektor korporat enggau perintah nengeri ba pengawa ngenegap sistem pengerai mensia mayuh.
"Pemeri keberan berubat ari PETRONAS tu ukai semina kelai aja tang madah pengeransing deka nyaup negap sistem pengerai mensia mayuh," ku iya madah.
Iya mega madah, sektor pengerai nyadi pengering enggau pugu pemansang Sarawak kelimpah pekara pelajar lalu begunaka kerejasama semua.
"Taja guna sektor pengerai tu besai, tang nengah kerejasama strategik kitai ulih mai ubah nyema semua rindu besaup enggau pangan diri," ku iya madah baru.
Ku iya, pemeri nya nyengkaum mesin ultrasound, MacroView Plus Otoscope, vascular doppler sereta kereban berubat ke bukai.
Kelimpah ari nya, iya madah, kerejasama PETRONAS enggau Sarawak Badan Amal Tenaga Isteri-Isteri (SABATI) sereta Opis Pengerai Nengeri Sarawak kenyau ari 2023 udah meri pemaik ngagai 17 buah klinik pengerai menua pesisir lalu 26 buah agi klinik deka nerima bantu beungkus urung RM1.3 juta di selampur Sarawak.
Bela datai maya nya Sapit Presiden III ke mega Sekretari Dipebasa SABATI Dato Enn Ong Siok Ean, Pemangku Presiden SABATI Dato Doreen Mayang Uggah, Manijer Besai Kaul Nengeri Anuar Ismail, Pegawai Pengerai Sitak Kuching ngarika Direktor Opis Pengerai Nengeri Sarawak Dr. Johnny Pangkas sereta ke bukai.-EDISI UKAS
