"Rise Of The True King Jr" Ngangkat Seni Panggau Jaku Inggeris Di Sarawak
KUCHING: Teater "Rise Of The True King Jr" ti ngena Jaku Inggeris siti pengawa ke berani sereta progresif ba pengawa ngenegap budaya seni panggau di Sarawak, lalu ngerandang peluang besai agi ngagai kaul sereta pemansang penau nembiak ba bidang seni pemerindang.
Sapit Menteri ba Opis Premier Sarawak (Pekara Korporat, Pemadah enggau UKAS), Datuk Abdullah Saidol madah, inisiatif nya ukai semina pemerindang panggau, tang bisi pengulih ngansak mayuh agi pengawa ngatur produksyen ti bekualiti dudi hari, nyengkaum meri peransang bekenaka jaku Inggeris nyadi medium pemerindang.
“Tu siti pengawa ti berani. Taja kala bisi pemerindang sebedau tu, teater sekali tu meri peluang diatur dudi hari lalu diperansang ngena Jaku Inggeris,” ku iya.
Iya madah munyi nya maya dirandau media lebuh ngulu produksyen teater nya ba Balai Budaya, Dewan Bahasa dan Pustaka (DBP) ditu, Hari Minggu.
Nambah ke jaku iya, iya madah, kaul nembiak mit enggau nembiak ari renggat sekula primari ba pemerindang panggau siti inisiatif positif ti patut diperansang sereta disukung.
Ku iya nerang, pengawa nya seriris enggau tuju Sarawak ke deka nyadi sebuah nengeri ti ngemerat pemansang budaya enggau aktiviti seni panggau.
“Sarawak benung majak ngenegap budaya enggau aktiviti panggau pemerindang, lebih agi nengah langgur pengawa nembuka ngaga palan seni ba Kunsil Nengeri Lama dalam timpuh dua taun deka datai, ti disadang nyadi siti ari palan seni pemadu besai ba Malaysia,” ku iya.
Iya andal, rebak biak ti ngemeran seni pemerindang nya bisi pengulih merindang ba palan nya nangkan tu ila.
Berebak enggau nya, Datuk Abdullah meri besai terima kasih ngagai direktor teater sereta semua tim produksyen, nyengkaum raban bukai.
Kelimpah sukung perintah enggau agensi bekaul, iya madahka pemesai guna bantu belanja dikena nentuka produksyen seni panggau ngembuan kualiti tinggi di Sarawak.
Produksyen teater “Rise Of The True King Jr” siti ari inisiatif seni ti ngayanka penau nembiak menua sereta mandangka pengeransing Sarawak ngadaka rebak baru besemekih ba bidang seni pemerindang.-EDISI UKAS
