SeDidik Majak Negap Pelajar Tumu Nembiak Mit Di Sarawak
KUCHING: SeDidik majak ngerikod pemujur signifikan negap pelajar tumu nembiak mit di Sarawak nengah ngerembai akses pelajar pra sekula, negap kualiti pengajar sereta bekenaka teknologi digital ba pengawa nisih sereta intervensyen tumu nembiak mit, seriris enggau juluk pemansang modal mensia nengeri.
Menteri Pemansang Indu, Nembiak Mit enggau Pengelantang Komuniti Sarawak Dato Seri Fatimah Abdullah madah, SeDidik udah mujur nyadi pugu besai agenda pelajar tumu nembiak mit di nengeri tu, lebih agi nentuka akses pelajar tumu ti nemban ngagai nembiak mit ba selampur Sarawak.
“Pekara bukai ti dikemerat kami iya nya begulai, pengelurus sereta inklusiviti. Alhamdullilah, pemujur udah dijapai SeDidik, aku ulih madah ke ketetiga pekara tu udah dijapai SeDidik.
“SeDidik mantu pengatur pengawa tadika enggau pelajar tumu nembiak mit bukai nentuka akses pelajar tumu ba nembiak mit Sarawak dijapai nyentuk 98 peratus,” ku iya ba Aum Kaunsil Direktor SeDidik, Hari Tiga.
Bela datai Sapit Menteri Pemansang Indu, Nembiak Mit enggau Pengelantang Komuniti Sarawak Datuk Rosey Yunus sereta Menijar Besai SeDidik, Ayub Dahari.
Iya mega madah, kelimpah akses enggau kualiti, prinsip inklusiviti enggau pengelurus bela nyadi pugu besai pejalai program pelajar tumu nembiak mit nengah SeDidik.
Ku iya, tetiap nembiak mit, enda ngira penatai enggau penau, patut diberi peluang sebela dikena mansang enggau chara ti patut.
“Kualiti mega udah dijapai kitai, kami deka ke semua pengajar SeDidik endang patut sereta landik ngajar. 100 peratus pengajar SeDidik bisi abis nadai diploma ba pelajar tumu nembiak mit. Bisi ke diatu ngembuan degree, lalu bisi ke seikas diploma mega,” ku iya.
Ku iya, juluk nya mujur dijapai manggai ujung taun 2025, nyengkaum pengajar ari program diploma pelajar seraya gawa.
“Nyadi, kami udah nempa pemujur nya ujung taun 2025, nyengkaum pengajar kitai ti ngambi program diploma pelajar seraya gawa.
“Diatu, kami temegah madah kesemua pengajar SeDidik endang patut diambi ngajar sereta bisi setipikit, enggau abis nadai bisi diploma pelajar tumu nembiak mit. Nya siti da penyulut besai ti dijapai SeDidik,” ku iya.
Berebak enggau nya, iya nyukung pejalai Program Digital Development Screening Tool (TOY8) ti dipeda ulih nentu pemansang sereta intervensyen tumu nembiak mit enggau chara ti nemban agi.- EDISI UKAS
