LONG LELLANG: Perintah Sarawak majak ngenegap agenda pemansang kandang menua ulu lebuh langgur nyeruri jalai ke mengkang nuju Long Lellang, Bagi Menua Miri disadang ditinda ba ujung Januari tu, lalu ngerandang peluang projek besai digaga ti dipelaba berengkah Jun 2026.

Sapit Menteri ba Opis Premier Sarawak (Pengereja Kasar, Imigresyen enggau Patau Projek) ti mega Kaban Kunsil Nengeri (ADUN) Mulu, Datuk Gerawat Gala madah, projek nya endang signifikan ba nyungkak pengulih, pengelikun sereta pengelantang peranak menua ulu, lebih agi ungkup komuniti di Long Lellang ke ngelama tu tusah mindah lebih agi maya musin pengujan.

“Jalai alun pugu pemansang. Akses ti manah ukai semina ngemuntangka peranak menua mindah, tang nyungkak pemansang ekonomi menua, ngerembai akses pelajar, servis pengerai sereta nambah manah tikas pengelikun rayat,” ku iya.

Iya nyebut munyi nya ba program penerang begulai enggau peranaka menua Long Lellang ti diatur Palan Servis N.78 Mulu enggau kerejasama Highland Development Agency (HDA), ditu, Hari Satu.

Ku iya, projek ti dilanggur mungkur pengawa nyeruri jalai 4.7 kilometer pemanjai ti berati ba endur kritikal ti seruran jai sereta pedis ditengah.

“Ari penyampau nya, 1.185 kilometer pemanjai deka disemin nentuka struktur jalai tegap agi sereta tan lama, lalu 3.690 kilometer da ngaul pengawa nyeruri jalai batu dikena ngambi ulih agi ditengah sereta likun agi,” ku iya nerang.

Nambah ke jaku iya, iya madah, projek nya nyerangkung pengawa nganti sepenyampau
31 unit engkelebat ngambi struktur likun agi sereta efektif agi.

Kelimpah ari nya, tiga jematan kayu ke dikena meraka sungai besai deka diganti enggau jematan besi bansa Composite Bridge ti tegap agi, likun sereta engkeman dikena lama.

Datuk Gerawat madah ke Perintah Nengeri nengah HDA ti nyadi agensi pengatur ransing nentuka projek tu digaga nitih spesifikasyen enggau standard ditetap.

“Enti proses ngulih belanja mujur, pengawa ngaga disadang berengkah Jun 2026. Perintah Nengeri ransing nentuka pejalai projek tu meri pemaik maksimum ngagai rayat,” ku iya.

Iya mega ngelalau peranak menua ngambi meri kerejasama nyengkaum nyukung, meri timbal sereta bela matau dikena nentuka projek tu ulih ditembu enggau mujur sereta efektif.

Sama datai, Direktor Kandang Menua HDA Juan Ubit, Pemancha Komuniti Penan Bagi Menua Miri Pemancha Hanneser Uning Bong, Penghulu Kandang Menua Long Seridan enggau Long Lellang Penghulu Willie Wing, Tuai Bansa Beraok Ibuh (Long Lellang A) sereta Tuai Bansa Tene Uked (Long Lellang).-EDISI UKAS