Palan Sukung Sosial Komuniti Deka Ditumbuh Di Sibu
SIBU: Siti Palan Sukung Sosial Komuniti (CSSC) deka ditumbuh di Sibu enda lama da.
Sapit Menteri Pengerai Mensia Mayuh, Pengawa Berumah enggau Perintah Lokal Sarawak, Datuk Michael Tiang madah, nya deka nyadi hab intervensyen sosial enggau palan makin begulai dikena nyukung individu sereta ruang bilik ti betapi enggau penanggul bejamah diri sebilik, charut enggau penanggul sosial bukai.
“Palan tu mega deka nyendiaka servis intervensyen pemun, ngatur kes enggau malin ngagai agensi perintah, institusyen nyaga pengerai sereta gerempung ukai dikuasa perintah,” ku iya ba siti penerang, Hari Empat.
Kaban Kunsil Nengeri (ADUN) Pelawan nya mega madah, palan nya bisi nyendiaka endur ngenduh ngagai sida ti dijamah bar uang bilik, dikena nyamin pengelikun enggau bejaga ari penusah bukai.
Kelimpah ari nya ku iya, entara pekara bukai ti dilanggur nyengkaum program negap indu enggau latih pengelandik, servis pengerai runding komuniti, nalan aktiviti nembiak enggau nembiak mit, bank pemakai komuniti sereta inisiatif dapur sup.
Berebak enggau nya, iya mega meri perati ngagai kes bejamah ba ruang bilik di Sibu ti dikerembai ba media sosial empai lama.
Taja nadai nyebut silik pasal kes nya, iya ningkah ulah bejamah bar uang bilik, sekali ke batang tubuh, jaku, pengasai ati tauka psikologi, ti ngumbai nya isu sosial berat lalu enda patut dikumbai pekara diri sebilik aja. -EDISI UKAS
