KUALA LUMPUR: Perintah Besai diansak ngerumban projejk jalai di Sri Aman ti lama tejanggal taja udah dilanggur enggau dikemendar kenyau ari Langgur Pemansang Malaysia Lumpar Ke-12 (RMK-12).

Kaban Parlimen Sri Aman Dato Sri Doris Sophia Brodi madah, projek infrastruktur pemun kelalu lama tejanggal ukai semina ngeruga pengelantang rayat aja, tang mega besibil enggau aspirasyen Langgur Pemansang Malaysia Lumpar Ke-13 (RMK-13) ti nyelinting pemansang inklusif enggau pengelantang rayat.

Iya masah, entara projek ti tejanggal baka nyeruri Jalai Menuang ke Langgir sepanjai 3.3 kilometer (km) standard JKR R3, enggau ungkus dipelaba RM46 juta ti udah dilanggur kenyau ari RMK-12 taun 2021 tang nyentuk diatu apin digaga.

“Komuniti di Langgir, Bukit Lesong agi nadai akses jalai lalu bepanggai ba sungai ti mayuh baya enggau tusah ditengah, kelebih agi maya ai langkang,” ku iya lebuh bejuraika Usul Menjunjung Kasih Titah Diraja di Dewan Rakyat, kena Hari Empat.

Kelimpah ari nya, Dato Sri Doris mega madah ke projek nyeruri Jalai Pantu ke Keranggas/Engkeranji sepanjani urung 22 kilometer ti dikemendar Unit Perambu Ekonomi (EPU) di baruh Rolling Plan 1 RMK-13 emgg ungkus siling RM142 juta, tang agi tejanggal nyentuk diatu.

“Jalai ke bisi diatu bebatu, lichin enggau enda likun ngujungka lebih 1,500 peranak ti betengahka jalai nya napi pemar.

“Projek tu enti tembu ila deka nyambung semilan rumah panjai nyengkaum dua sekula, iya nya Sekula Primari (SK) Keranggas enggau SK Engkeranji.

Iya nyemetak madah, infrastruktur jalai ti manah ukai semina ungkup pengelantang aja, tang mega bisi kaul enggau akses pelajar, servis pengerai enggau peluang ekonomi rayat menua pesisir.

Berindik ari nya, iya minta kededua projek nya dirumban ba RMK-13 seriris enggau Titah Kebawah Duli Yang Maha Mulia Seri Paduka Baginda Yang di-Pertuan Agong ti berati ke pengelantang rayat nengah pemansang infrastruktur pemun.-EDISI UKAS