Sapit Menteri ba Opis Premier Sarawak (Pekara Korporat, Pemadah enggau UKAS), Datuk Abdullah Saidol madah, projek besai nya deka mai ubah besai ngagai pengidup peranak di Kampung Paloh, Kedang enggau Berangan, kelebih agi ari sukut akses, ekonomi enggau pengelantang.
“Tu ukai semina perambu ba atas keretas, tang siti projek ti deka mai seribu pemaik ngagai rayat,” ku iya.
Iya madah munyi nya ba Program Ngabang Aidilfitri N.42 Semop di Kampung Paloh enggau Kedang, kena Hari Lima.
Datuk Abdullah ti mega Kaban Kunsil Nengeri (ADUN) Semop madah, projek sepanjai urung 26 kilometer nya ngaul ngaga jalai sereta siti jematan meraka Sungai Batang Belawai, beungkus dipelaba manggai RM800 juta nengah agih belanja Perintah Besai enggau Perintah Sarawak.
Ku iya, projek nya entara agenda besai ti ditegi nentuka endur nya disambung enggau rentayan jalai ti menyana seikas enggau pemansang ba endur bukai.
Nambah ke nya, iya mega ngemerat peminta ngaga baru Sekula Primari (SK) Orang Kaya Muda Pakeri di Paloh ti diatu enda likun dikena.
“Pelajar nya pugu nempa rebak dudi hari. Nya kebuah, pengawa ngaga baru sekula tu meseti dirumban nentuka bala anak ulih belajar dia,” ku iya.
Pia mega, iya madah ke sekeda projek bukai ti benung enggau deka dipejalai ba Paloh, Kedang enggau Berangan, nyengkaum projek sapat pantai tumpur, nyeruri jalai genturung pendiau enggau ngaga jelatung.
Berebak enggau nya, iya nfarap komuniti liat ati laban semua projek ti dilanggur deka dipejalai berenggat bepanggai ngagai awak enggau atur pengawa nya.
“Perintah keran nentuka tetiap projek tu dikemujur ke pengelantang rayat,” ku iya agi.
Bela datai, Kaban Parlimen Tanjong Manis, Dato Ir Yusuf Abd Wahab. -EDISI UKAS
