LIMBANG: Sarawak ransing ngemansang kuasa gadung nyadi chara strategik ngambi nyadi hab kuasa beresi serantau sereta ngurangka pengawa bepanggai ngagai bahan api fosil manggai 2030.

Sapit Menteri Industri Pemakai, Komoditi enggau Pemansang Kandang Menua Sarawak ti mega Kaban Kunsil Nengeri (ADUN) Bukit Kota, Datuk Dr Abdul Rahman Ismail madah, nengeri tu ngembuan pengelebih pengeraja asal nentuka pemansang kuasa ulih dikena baru baka hidroelektrik, solar enggau hidrogen ngambi tetangkupka peminta domestik sereta makit eksport.

Ku iya, inisiatif nya ukai semina nyukung juluk nengeri baruh karbon, tang mega ngerandang peluang ngagai pemansang industri baru berega nyengkaum teknologi nyimpan kuasa enggau hidrogen ti ulih nambah peluang ekonomi inklusif agi.

Iya madah munyi nya ba Pengerami Makai Selamat enggau Aidilfitri Komiti Tetap Pengerami Islam Limbang Tahun 1447H/2026M ti diatur di Dewan Bunga Raya, kena Hari Empat.

Nambah ke nya, iya nyemetak madah ke pengawa meranak puku ba teknologi sereta kerejasama strategik ba renggat antarabansa deka terus ditegap nentuka Sarawak ba luan dalam ekonomi kuasa baru di Malaysia.

Ngenang pekara ti nyadi diatu, iya madah ke perintah nengeri mega berati ke empas ekonomi global enda menuku kelebih agi penyarut ba Asia Barat ti meri empas ngagai rega minyak enggau belanja idup.

Berebak enggau nya, iya madah ke siti da pakej bantu disadang dibantai Premier Sarawak Datuk Patinggi Tan Sri (Dr) Abang Abdul Rahman Zohari Tun Datuk Abang Openg nyema pekara tu majak nyadi nyadi chara mitigasyen nyaup rayat ti napi penusah.

Sama datai Pegawai Pelilih Limbang, Sulaiman Engal, Chairman Kaunsil Pelilih Limbang Sufian Mohat, pengari Pegawai Pengarap Islam Bagi Menua Limbang Abdul Rahman Iqbal Aldi, Pegawai Pengerai Bagi Menua Limbang Norliza Jusoh enggau Pemancha Sahat Bagol. - EDISI UKAS