LUNDU: Perambu numbuh baru Indu Opis Polis Pelilih (IPD) Lundu diatu diperati perintah nyadi inisiatif strategik negap infrastruktur pengelikun sereta nambah penyikar ngenatai servis ngagai mensia mayuh.
Menteri Pemansang Indu, Ruang Bilik enggau Komuniti ti mega Kaban
Parlimen Santubong, Dato Sri Nancy Shukri madah, perambu nya udah dibantai raban IPD Lundu nengah Tuai Polis Pelilih ke alai dua endur dikelala nyadi taba pemansang baru.
Ku iya, endur ti diperambu nya ba mua enggau tisi Palan Penyulut Teknologi Sarawak (CENTEX) Lundu, tang perambu nya agi ba renggat tumu lalu begunaka pansik silik nyengkaum pemendar ari perintah nengeri, kelebih agi ba sukut ngempu tanah.
Iya madah munyi nya ba aum pemberita pengudah Pejalai Ngabas Seraya Gawa ngagai IPD Lundu, kena Hari Lima.
Iya nyemetak madah ke peminta nyeruri IPD Lundu nya nipak pangku pengawa nyadi palan besai komuniti ngulihka servis pengelikun sereta mantaika kompelin seraya begunaka fasiliti ti moden enggau lantang agi.
Ba pekara sama, iya mega madah ke projek pemansang Balai Polis Sematan nengah Langgur Pemansang Malaysia Lumpar Ke-12 (RMK-12) udah dikemendar nengah agih belanja beungkus RM2 juta.
Ku iya, projek nya nyengkaum ngaga baru begunan ti bisi diatu ari struktur kayu ngagai begunan semin lalu diatu ba renggat mantar dipejalai.
Nambah ke nya, Dato Sri Nancy nerang ke perambu ngaga IPD baru meseti dipejalai nengah atur ti ditetapka nyengkaum nyendia keretas jurai ngambi dibantai ngagai Opis Menteri Dalam Menua (KDN) sebedau diserenih ari sukut peminta enggau ungkus ti diguna.
Pejalai nya mega ngemata pengawa nyua kereban nengah Program Rentayan Siru NS baka kanopi, bangku enggau mija dikena nyukung operasyen sereta program ngaul komuniti IPD Lundu.
Kenyau ari taun 2023 nyentuk 2025, sepenyampau RM836,101 udah diagih dikena nyukung peminta logistik raban polis enggau komuniti, nyengkaum nyendia kanopi, speaker sereta lampu solar.
Sama datai, Tuai Pegawai Eksekutif Yayasan Pengelantang Menua, Nordina Haron, Sapit Direktor Besai Opis Pengintu Pengelantang Komuniti (JKM) Sarawak Mohd Ali Taib enggau Tuai Polis Pelilih Lundu Supt Sudirman Kram. - EDISI UKAS
