TATAU: Sepenyampau 2,894 ba sekeda menua ti tepekul di Pelilih Tatau mujur nerima bantu pemakai berindik ari jalai darat enda ulih ditengah ketegal ampuh.
Menua nya ngaul 69 rumah panjai, dua genturung pendiau sereta dua klinik pengerai di menua Kelebu, Kakus, Penyarai, Sungai Sap, Ulu Anap, Nanga Tau, Entajum, Kampung Dagang, Kampung Baru, Annau, Muput enggau sekeda menua bukai.
Pengawa nganjung bantu nya dipejalai berenggat ngena perau nengah jalai sungai sereta entukar pikap (4WD) enggau lori, bepanggai ba gaya menua nya.
Operasyen nya ngaul 25 raban ari mayuh agensi nyengkaum Opis Bomba enggau Penyah Penusah Malaysia (JBPM), Polis DiRaja Malaysia (PDRM), Raban Penyaga Orang Periman Malaysia (APM), Opis Pengintu Pengelantang Mensia Mayuh (JKM), Unit Pengelikun enggau Penerit Adat Sarawak (UKPS), Opis Pelilih Tatau sereta Opis Pelajar Pelilih Tatau Sebauh (PPDTS).
Pegawai Pelilih Tatau, Calvin Ligong meri terima kasih ngagai semua agensi besaup nentuka bantu datai ba peranak ti tasah.
“Semangat kerejasama enggau besaup gawa semua agensi udah meri asil lebuh semua bantu mujur dianjung, taja betapi mayuh penekul nyengkaum nanggung enggau mindahka barang bantu ti berat nintint hari,” ku iya.
Berebak enggau nya, iya madah ke gaya bah taun tu ulih dijaga dibanding taun siti nyin tadi lalu nadai Palan Pengenduh (PPS) dibuka, taja bisi menua tepekul ketegal jalai ampuh kandang berapa hari.-EDISI UKAS
