KUCHING: Minyak mata Malaysia lebih agi ari Sarawak endang berega agi nyema dikena ungkup sektor betikas besai enti dibanding dikena domestik aja ti tau mulaika asil ke lebih strategik ngagai nengeri enggau menua tu.

Speaker Kunsil Nengeri (DUN) Sarawak, Tan Sri Datuk Amar Mohamad Asfia Awang Nasar madah, minyak ke diasil ari Sarawak sereta beberapa nengeri bukai baka Sabah, Terengganu enggau Kelantan jauh manah ari minyak menua bukai.

Ku iya, minyak betikas tinggi nya engkeman agi dikena ba industri teknologi tinggi baka bilun enggau mesin besai enti dibanding ari ke dikena baka perengka pengangkut ngelama tu.

"Kitai enda meri mayau makai ikan empurau berega RM1,500 sekilo tang diungkupka lebih agi nya. Pia mega baka minyak kitai ke betikas premium, enda dikena diesel, motosikal tauka perau tang diungkup ngagai sektor ti besai agi," pia ku iya.

Iya bejaku munyi nya ba Pengerami Ramah Tamah Aidilfitri 2026 ba Atrium Kompleks DUN Sarawak ditu, Hari Tiga.

Pengerami nya digulu Yang di-Pertua Negeri Sarawak, Tun Pehin Sri Dr Wan Junaidi Tuanku Jaafar enggau bini, Toh Puan Datuk Patinggi Fauziah Mohd Sanusi.

Ba pekara bekaul, iya madah, pengering pun penatai pengeraja asal nengeri tu nyadi pemun ngeringka ekonomi Sarawak ti bela nyaup penegap ekonomi menua.

Ku iya, Sarawak mega bisi pengulih nyadi menua eksport ai dudi hari ila.

"Kitai temegah ati Premier Sarawak ngembuan penemu jauh ke mua, enti minyak abis ila deka diganti enggau hidrogen lalu ngena hidrogen tu kitai ulih ngemansangka nengeri enggau menua," ku iya madah baru. -EDISI UKAS