KUCHING: Yang di-Pertua Negeri Sarawak, Tun Pehin Sri Dr Wan Junaidi Tuanku Jaafar enggau bini, Toh Puan Datuk Patinggi Fauziah Mohd Sanusi datai ngerichah Pengerami Ramah Tamah Aidilfitri Kunsil Nengeri (DUN) Sarawak, Hari Tiga.

Penatai seduai urung 11.30 pagi disambut Speaker DUN Sarawak, Tan Sri Datuk Amar Mohamad Asfia Awang Nasar enggau sapit iya, Dato Idris Buang.

Pengerami ke diatur ba Atrium DUN Sarawak nya dulu raban tuai nengeri nyengkaum Sapit Premier Sarawak, Datuk Amar Awang Tengah Ali Hasan enggau Datuk Amar Profesor Dr Sim Kui Hian.

Bela datai, Menteri ba Opis Premier Sarawak Dato Sri John Sikie Tayai, Menteri Dagang Temuai Industri Kreatif enggau Seni Pemerindang Sarawak Dato Sri Abdul Karim Rahman Hamzah, Menteri Utiliti enggau Telekomunikasyen Sarawak Dato Sri Julaihi Narawi, Menteri Pelajar, Inovasyen enggau Pemansang Pengelandik Sarawak Dato Sri Roland Sagah Wee Inn, raban Sapit Menteri Kabinet Sarawak, raban Kaban Kunsil Nengeri (ADUN) sereta pemesai ke bukai.

Maya nya Tun Pehin Sri Dr Wan Junaidi enggau Toh Puan Datuk Patinggi Fauziah dipebasa ngemata pengawa nyuaka pemeri RM10,000 ari Tan Sri Datuk Amar Mohamad Asfia ngagai Opis Pengintu Pengelantang Anak Patu Balu Sarawak (PERYATIM).

Pengerami maya nya bela ngelai pemanah kaul ke dikembuan ti nyadi pemun pemujur pemansang Sarawak. -EDISI UKAS