KOTA SAMARAHAN: Pejalai Pelin Pelajar Menua ti netapka nembiak masuk sekula umur enam taun enggau pelajar prasekula umur lima taun diperati pengawa ti patut dikena negap pugu pelajar enggau intervensyen tumu ulih dipejalai enggau nemban.

Menteri Pelajar, Inovasyen enggau Pemansang Penau Sarawak, Dato Sri Roland Sagah Wee Inn, madah ke polisi nya di baruh bidang kuasa Perintah Besai enggau digaga bepelasarka peminta sistem pelajar menua.

“Pelin Pelajar Menua tu endang ditetapka Perintah Besai, nyengkaum polisi masuk sekula ba umur enam taun enggau prasekula umur lima taun. Kebendar, pekara tu ukai pekara ti baru,” ku iya.

Iya nyebut pekara nya lebuh dirandau media ba Pengerami Nyua Setipikit Program Semiconductor Mastery diatur SMD Semiconductor di SMD Academy, La Promenade, ditu, Hari Lima.

Ku iya, masuk sekula umur enam taun udah lama dikemeran kenyau ari suba lalu enda ngeruga nembiak mit mansang, tang relevan agi ba konteks lebuh nembiak mit udah teleba belajar.

“Diatu, nembiak mit kenyau ari mit udah dianjung ke play school. Sida belajar besosial, berinteraksi enggau bemain sambil belajar.

“Nya alai, lebuh datai ba umur empat tauka lima taun, sida kebendar udah teleba enggau rampa belajar,” terang iya.

Ngenang pengirau nembiak mit di menua pesisir ulih belajar, iya madah mayuh pengawa udah dipejalai nentuka akses pelajar tumu ulih diasai semua.

“Kitai udah mayuh ngemanah perengkaguna nyengkaum tadika di kandang menua pesisir nengah KEMAS enggau mega tadika Sedidik dikuasa Perintah Sarawak.

“Taja ukai semua ulih ditangkup tang tebal agi komuniti kebendar udah sedia,” ku iya.

Berebak enggau nya, iya mega nerang ke penilaian akademik ba renggat tumu sekula, nyengkaum perambu peresa Primari Empat, enggau tuju ngelala pengelemi nembiak tumu agi lalu ukai dikena ngukum.

“Penilaian tum utu beguna endar ungkup intervensyen. Ukai reti nembiak ti puntan deka dibuai sekula. Tang meri kelai ngagai kitai pasal gaya bantu enggau program bantu ti patut diberi,” ku iya.

Iya nyemetak madah ke laun ngadu intervensyen tau meri empas timpuh panjai ngagai nembiak.

“Enti kita nganti nyau Primari Enam tauka Pom Tiga baru nemu nembiak enda ulih macha enggau nulis, tu udah kelalu laun. Nya kebuah intervensyen tumu manah agi,” ku iya.

Iya mega madah, peresa dipejalai terit agi ba siti-siti renggat baka Primari Enam enggau tuju masuk ke sekula antarabansa enda ngeruga program intervensyen ke bisi lalu seriris enggau chara penilaian dba renggat nasional.- EDISI UKAS