LAWAS: Kompleks Opis Administrasyen (AOC) Lawas disadang diserah ngagai Perintah Sarawak bulan Februari tu, lalu nyadi penyungkak pengawa nyeraris servis perintah ti berurun agi, begulai enggau efisien ba pelilih tu.

Pekara nya dipadah Sekretari Perintah Sarawak, Datuk Amar Mohamad Abu Bakar Marzuki rambau pejalai gawa ke taba projek nya ngabas pengawa kepenudi ngaga kompleks, Hari Enam.

Bepelasarka penerang ari Opis Kereja Raya (JKR) Bagi Menua Limbang, projek ngaga Kompleks AOC Lawas diatu ba tikas kepenudi enggau benung chakah digaga nitih taga ti ditetap.

Ba pejalai gawa nya, Datuk Amar Mohamad Abu Bakar mega limpang ngabas opis mayuh agensi perintah ti deka digelumu ba kompleks peninggi 15 ringkat nya.

Pengawa nya disadang ulih negapka agi koordinasyen entara opis, ngerumban atur pengawa sereta ngemuntang pengawa rayat, kelebih agi peranak di Pelilih Lawas.

Projek ngaga Kompleks AOC Lawas mandangka Perintah Sarawak seruran naka ulih negap infrastruktur administrasyen ba sitak utara nengeri.

Nya seriris enggau peminta kemaya hari, servis perintah mansang sereta juluk perintah nambah kualiti bejalaika servis ngagai rayat.

Sama datai, Kaban Parlimen Lawas, Dato Henry Sum Agong,Residen Bagi Menua Limbang, Yunus Tambi, Pegawai Pelilih Lawas, Ladin Atok, Direktor Unit Digitalisasi Servis Perintah Opis Premier Sarawak, Datu Grace Huong Siew Hung sereta Direktor Unit Administrasyen Opis Premier Sarawak, Rusmaliza Mat Darus.-EDISI UKAS