LUNDU: Karnival Lumba Integrasyen Komuniti diatur Unit Komunikasi Awam Sarawak (UKAS) enggau kerejasama Opis Pelilih Lundu enggau Palan Servis ADUN Opar sereta Tanjung Datu mujur ngempuruka lebih 500 penyereta enggau peranak lokal ba siti pelasar ti negap kaul entara pengereja perintah, komuniti enggau media.

Kaban Kunsil Nengeri (ADUN) Opar, Billy Sujang madah ke program keterubah nya diatur meri empas positif ngempung rayat nengah aktiviti lumba bebakih ti ngaul raban UKAS, MAKSAK, opis perintah enggau komuniti menua nya.

“Program tu ukai semina narak gaya idup bepengerai aja, tang mujur ngerapit tanggam kaul entara raban gawa perintah enggau komuniti.

“Aku ngarap ke kaul tu enda naka ditu aja, tang ditampung ba program ninting taun renggat pelilih menua enggau ngaul mayuh agi komuniti,” ku iya lebuh dirandau media ba Program Intergrasyen Komuniti @ Lundu “Lumba Ngempung Komuniti” diatur UKAS ditu, Hari Enam.

Ku iya, 300 pemain enggau lebih 500 bala penyukung ti datai meda chukup manah, lalu nunjukka sukung tegut komuniti ba pengawa ngempung komuniti nengah aktiviti meri pemaik.

Seraya Pegawai Pelilih Lundu, Zulkarnain Ismail madah ke program nya nyadi pelasar pemadu manah ngerapitka kaul entara opis perintah, komuniti menua enggau raban media.

“Pangku pengawa media beguna endar nyadi penabur penerang ngagai komuniti. Nya alai,
program baka nya mantu nempa kaul rat agi entara komuniti, perintah enggau agensi media,” ku iya.

Berebak enggau nya, Direktor UKAS, Awang Putrayusrie Awang Redzuan madah ke program Integrasyen Komuniti UKAS di Lundu nyadi pengepun ngagai chara ngundang rayat semak agi.

“UKAS nyadi pelasar nabur penerang perintah deka ngundang peranak ba pelilih menua, meretika sada peminta enggau negap kaul begulai enggau bala tuai sitak nya.

“Nambah ke nya, program tu mega meri peluang ngagai raban UKAS ngemeran gaya idup bepengerai enggau sedia napi pemar gawa ba taun deka datai,” ku iya.

Iya mega meri terima kasih ngagai Opis Pelilih Lundu, raban Opis Menteri Nembiak, Lumba enggau Pemansang Orang Dagang Sarawak (MYSED), sereta komuniti lokal ti nyukung ngemujur program nya taja diatur jelan pemesai tang besai reti.

Program nya ngaul bemacham program lumba baka badminton, pickleball enggau batak tali sereta main bol ti mega ngerichah bala penyereta.-EDISI UKAS