SEBUYAU: Jematan Batang Lupar No.1 disadang ulih ditengah ujung Mei tu ke diatu udah digaga 94.6 peratus.

Sapit Menteri Infrastruktur enggau Pemansang Penyangkai Kapal Sarawak Datuk Ir Aidel Lariwoo madah, projek infrastruktur beungkus RM848.75 juta nya diatu digaga ba renggat ke penudi lalu dipelabaka tembu kena 15 Mei 2026.

"Projek tu digaga enggau mujur taja bisi penanggul teknikal ba Pier 52, tang udah diputar.

"Jematan tu deka tembu bulan Mei. Reti iya sebedau Gawai jematan tu ulih ditengah mensia mayuh," ku iya maya dirandau ba pengawa 'Final Stitching' ba taba projek nya di Kampung Beliong, Sebuyau, Hari Satu.

Datuk Ir Aidel madah, penembu jematan nya deka mai empas besai ngagai sistem jalai sereta pengerembai ekonomi lebih agi ba peranak Sebuyau empu.

Kelimpah ari nya ku iya, bisi semilan iti agi jematan deka tembu taun tu mega.

"Rentayan jalai alun ba menua tengah enggau pesisir di nengeri tu deka manah agi ari penembu jematan tu lalu disukung enggau penembu Jalai Besai Pan Borneo, jalai nebing tasik enggau Jalai Besai Kedua.

"Reti iya semua jalai tu besambung nyengkaum 'spur roads' ti nyambung Jalai Besai Pan Borneo enggau jalai nebing tasik," ku iya nerang.

Bela datai maya nya Direktor Opis Kereja Raya (JKR) Sarawak, Datu Adj. Prof Ir. Ts Gs Br Pmr Dr. Cassidy Morris, Sapit Sekretari JKR Sarawak, Ir. Wisil Lichok enggau Residen Sitak Samarahan, Mohamad Irwan Bahari Bujang. -EDISI UKAS