SONG: Balai Mensia Mayuh Kebiau, Song ke digaga enggau ungkus RM1.92 juta udah dipenyadi Menteri Kereja Raya Malaysia ti mega Kaban Parlimen Kapit, Dato Sri Alexander Nanta Linggi, Hari Minggu tu tadi.
Nitih ku Dato Sri Alexander Nanta, Balai Mensia Mayuh Kebiau ukai semina alai gempuru, tang kelai pemansang enggau penyerakup rayat Song.
"Balai tu nyendiaka perengka guna ti engkeman, moden sereta inklusif ungkup macham aktiviti komuniti,” ku iya.
Projek tu tembu kena 13 Mei 2024 lalu digaga Opis Kereja Raya (JKR) Sarawak enggau kerejasama JKR Bagi Menua Kapit enggau Kaunsil Pelilih Kapit.
Maya program bejadi nya, Dato Sri Alexander Nanta bela nyua Setipikit chiri Tuai Genturung Pendiau enggau Tuai Bansa (KMKK) ngagai tiga Tuai Genturung Pendiau ke baru, 43 Tuai Rumah, sereta setipikit basa ngagai tiga Tuai Genturung Pendiau ke badu gawa.
Berebak enggau nya, bela diatur iya nya kelai nyua kereban berikan darat nengah Program Sosio-EkonominCommunity@SCORE RECODA ari URDA ungkup semilan penyereta berikan darat ba Pelilih Song.
Pengawa nyua setipikit tu diatur pengudah program berikan darat bulih timbal positif ari rayat menua enggau tuju bantu kereban nya dikena nyungkak penatai pemisi ruang bilik sereta nyaup pemeruan industri berikan darat.
Sama datai, Sekretari Politik Menteri Kereja Raya Ambrose Abong Bugek, Sekretari Politik Premier Sarawak Watson Awan Jalai, Residen Bagi Menua Kapit Elvis Didit, Pegawai Pelilih Song Harry Bruce Edwin, Chairman Kaunsil Pelilih Kapit Andy Lawrence sereta raban tuai genturung pendiau menua. -EDISI UKAS
