KUCHING: Sarawak benung ngelangkar ekosistem penerebai bilun ungkup dudi hari ti lebih agi ngemeratka pekara pengelikun, pengepuh, penau sereta atur engkeman seriris enggau standard antarabansa.
Menteri Pengangkut Sarawak, Dato Sri Lee Kim Shin madah, sektor penerebai bilun ukai semina nyaup penumbuh ekonomi tang mega beguna ngagai Sarawak ke ngembuan geografi besai kelimpah genturung pendiau ti jauh betakah di menua pesisir, ulu sungai enggau menua bebukit.
"Ba kitai Sarawak, penerebai bilun tu ukai siti pengaya tang mayuh guna iya. Tu bekaul amat enggau komuniti menua pesisir, nyukung dagang temuai, dagang kelimpah pengulih kitai napi penusah enda disadang nyadi," ku iya madah.
Iya bejaku munyi nya maya Konferens enggau Program Pemandang Aeroangkasa Asia Pasifik 2026 ba Palan Konvensyen Borneo Kuching (BCCK) ditu, Hari Dua.
Iya mega madah, sebedau pandemik, padang bilun di Sarawak ulih dikena 10 juta iku penumpang ninting taun, ti mandangka sektor nya beguna bendar ba pengidup ninting hari enggau pengerembai ekonomi nengeri.
Ketegal nya Dato Sri Lee madah, Sarawak benung ngaduka pansik pengulih ngaga Padang Bilun Antarabansa Kuching ke baru ti disadang ulih dikena lama urung 30 ngagai 50 taun ke deka datai.
"Pansik tu bela ngira padang bilun nya ulih dikena teknologi dudi hari, tan napi ubah gaya hari lalu disempulang enggau elemen bekaul pengetan enggau pengepuh berengkah ari agi dilangkar," ku iya nerang baru.
Iya mega madah, padang bilun baru nya ulih digaga nyadi siti aerotropolis ti mungkur pekara bekaul ngadu sereta ngemanah (MRO), ngaga komponen aeroangkasa, logistik, latih enggau servis sukung industri.
Berebak enggau nya, Dato Sri Lee madah, pengelebih Sarawak ti ngembuan 'Short Take-Off and Landing airport' (STOLport) nyadi pengelebih strategik, lebih agi dikena ngelawa menua pesisir tauka pengawa bekaul nganjung ubat tauka bisi program mantu.
"STOLport tu ukai infrastruktur lama tang aset strategik ti majak relevan," pia ku iya.
Nambah ke nya ku iya, pengawa Perintah Sarawak ngambi MASwings bela nyadi chara strategik nyungkak sistem penerebai bilun menua tu lebih agi ungkup menua pesisir.
Kelimpah ari nya, iya madah, Sarawak bela ngemeratka pemansang pengelandik ba sektor penerebai bilun nengah kerejasama institusyen menua tu enggau antarabansa ba bidang injiniring, operasyen padang bilun, pengelikun enggau pengelandik digital.
Ari nya ku Dato Sri Lee, Sarawak semampai deka bekerejasama enggau bakih serantau tauka antarabansa bekaul pejalai penerebai bilun, servis aeroangkasa, latih sereta inisiatif penerebai bilun gadung seriris enggau tanggungpengawa nengeri tu ba kerejasama BIM IAGA. -EDISI UKAS
