Belanda Nyendia Pengelandik Ngatur Ai, Mantu Sarawak Mutar Bah
KUCHING: Belanda madah kediri sedia bekunsi pengelandik sereta peneleba ngatur ai dikena mantu Sarawak mutar penganggul bah ti majak raya diparit ubah klimet.
Duta Besai Belanda ke Malaysia Jacques Warner madah, pekara nya dikerandau ba penemuai basa iya ngagai Sapit Premier Sarawak Datuk Amar Prof Dr Sim Kui Hian, enggau berati ke kerejasama bekaul pengawa ngatur ai.
Nitih ku iya, Belanda disadang deka nyain Sempekat Pemereti Ati (MoU) bekaul kerejasama ai nengah Perintah Besai enda lama da, lalu merambu skop kerejasama ti sebaka bela dikerembai begulai enggau Perintah Sarawak.
"Kenyau beratus taun, kami udah ngena mayuh chara mutar ti ngasuh kami teleba enggau bisi penemu ba penanggul ngatur ai.
"Penemu, pengelandik sereta kereban enggau servis tu deka dikunsi kami enggau Sarawak dudi hari dikena mantu ngurangka penanggul bah,” ku iya.
Iya madah munyi nya maya dirandau pemberita pengudah penemuai basa ngagai Datuk Amar Dr Sim di Wisma Bapa Malaysia, Petra Jaya, Hari Tiga.
Iya madah, Sarawak udah napi bah ti raya kandang berapa taun tu, nyengkaum di Bintulu, Sibu enggau sekeda kandang menua bukai, lalu begunaka chara timpuh panjai ti komprehensif.
Nya alai, ku iya, kerejasama enggau pengawa bekunsi pengelandik ba pekara tu beguna dikena ngurangka penanggul bah ngira penusah ngenyit tu deka suah nyadi laban ubah klimet deka ngasuh penusah besai agi tau nyadi.
Berebak enggau nya, Jacques madah, penemuai iya ba Sarawak mega mai sekeda pengari kompeni Belanda ti bisi ati nyaup juluk ati Sarawak ba ngaga mayuh agi padang bilun sereta ngemaruka perengka guna ke mengkang bisi diatu.
"Kami bisi sekeda kompeni Belanda ti bisi ati nyaup ngamatka tuju nya,” ku iya.-EDISI UKAS
