KUCHING: Penempa enda nekul indu di Sarawak nyulut lalu sida mangku pengawa besai ba pemansang nengeri.
Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg, madah ke nadai agi peragam penemu lelaki aja nyadi tuai enggau penengkebang polisi nengeri, tang peluang nya disedia ngagai semua, enda ngira penempa bepelasarka merit sesiku.
“Ba rintai pegawai servis Perintah Sarawak, kitai udah meri peluang ngagai indu sama ngaga pemutus ba renggat Sarawak ke alai kitai bisi Sapit Sekretari Perintah Sarawak (Administrasyen) ti baru dichiri ari raban indu.
“Kelimpah ari nya, tu mih keterubah Kaunsil Pemansang Ekonomi Sarawak (SEDC) bisi Tuai Pegawai Eksekutif indu enggau SEDC nyadi kaunsil ti besai ba ekonomi Sarawak, tanggungpengawa indu beguna ba pemansang ekonomi kitai,” ku iya.
Iya madah munyi nya maya bejaku ba program Ngintu Hari Indu Antarabansa 2026 Zon Borneo, ditu, Hari Tiga.
Iya madah baru, ari ekonomi moden tumbuh baka kuasa gadung, hidrogen, ekonomi digital, aeroangkasa, industri kreatif enggau teknologi tinggi, kaul indu mega diguna.
“Kitai begunaka injinir indu, lalu ba Opis Kereja Raya (JKR) diatu mayuh injinir indu, kitai dekaka saintis indu, kitai dekaka pakar data indu ti deka nyadi pakar analisis data, kitai mega begunaka orang dagang teknologi indu enggau tuai indu ba tiap sektor baru tu.
“Nadai bida indu enggau lelaki nyulut laban semua iya bepelasarka merit diri empu,” ku iya baru.
Nerang silik, iya madah ke tanggunpengawa indu ukai semina mantu ngemansangka nengeri, tang ngesan tanggungpengawa besai nyaup ekonomi ruang bilik, nyaga pesaka budaya sereta pugu pengentap rama ba komuniti diri.
Sama datai, Sapit Premier Sarawak Datuk Amar Profesor Dr Sim Kui Hian, Speaker Kunsil Nengeri (DUN) Sarawak Tan Sri Datuk Amar Mohamad Asfia Awang Nasar, Menteri Pemansang Indu, Ruang Bilik enggau Komuniti Dato Sri Nancy Shukri, Menteri Pemansang Indu, Nembiak Mit enggau Pengelantang Komuniti Sarawak Dato Sri Fatimah Abdullah, Menteri Dagang Temuai, Industri Kreatif enggau Seni Pemerindang Sarawak Dato Sri Abdul Karim Rahman Hamzah, raban Sapit Menteri sereta temuai dipebasa ke bukai. -EDISI UKAS
