SARIKEI: Pengerami Ngintu Taun Baru 2026 nyadi lambang pengelantang Sarawak laban ukai semina diintu raban bansa China aja, tang mega richah enggau penatai komuniti pupu bansa, seraya nyeremin semangat beserakup enggau idup lantang ti terus dijaga ba Sarawak.
Sapit Menteri Pengawa Bekebun Bedandang Besai enggau Komoditi ti mega Kaban Parlimen Sarikei, Dato Sri Huang Tiong Sii madah, pengerami nya ukai semina diintu chara tradisyen, tang mega beguna endar dikena ngerapit kaul sereta meransang semangat bela bebasa ke pangan diri.
“Pengerami tu nyadi pelasar ngempung rayat nadai ngira tirai juru nipak juluk Sarawak ti lantang enggau begempung,” ku iya.
Iya madah munyi nya lebuh bejadi Pengerami Ngintu Taun Baru China 2026, ditu kena Hari Lima.
Ku iya agi, rayat diperansang terus ngesan pangku pengawa nyukung pemansang sereta pengelantang nengeri ke pemaik begulai.
Nambah ke nya, Dato Sri Huang ngena peluang nya meri Selamat Taun Baru China nuju semua ti ngintu pengerami nya sereta besampika taun tu mai pengaga, gerai, lantang enggau mujur ngagai serap komuniti. - EDISI UKAS
