BAU: Projek nyeruri Jalai Jambusan ke Bidayuh Cultural Centre Bau beungkus RM247,332.70 udah tembu digaga.

Pengawa nyerah taba projek ari raban kontraktor ngagai Kaunsil Pelilih Bau ti nyadi agensi pengatur projek udah diatur kena Hari Lima.

Projek nengah Agensi Penyeraris Pemansang Greater Kuching (GKCDA) nya sepanjai 510 meter enggau pemesai 8 meter belabuh digaga ujung bulan November 2025.

Bela datai ngemata pengawa nyerah taba projek iya nya Sapit Menteri Pengangkut Sarawak (Sungai enggau Tasik) ti mega Kaban Kunsil Nengeri (ADUN) Tasik Biru, Datuk Henry Harry Jinep.

Sama datai iya nya Pegawai Pelilih Bau, Eddy Nayoi, Tuai Pegawai Eksekutif GKCDA, Datuk Ik Pahon Joyik enggau Sekretari Kaunsil Pelilih Bau, Ong Chin Ping.

Dulu ari nya, Datuk Henry ngabas taba ngaga Bidayuh Cultural Centre Bau nengah Projek Rayat ti nyau deka tembu. - EDISI UKAS