KUCHING: Pengelain raban bansa enggau budaya ti dirami begulai enggau nadai takah nyadi pengering Sarawak nempa pengelantang komuniti, seraya ngangkatka nengeri tu nyadi model penyerakup ba renggat nasional.

Sapit Menteri Besai, Datuk Amar Fadillah Yusof madah, semangat begulai nya dibantai nengah bejalaika mayuh inisiatif sosial enggau komuniti ti ngaul serap komuniti ba nengeri tu.

“Nya kebuah, tu endang semangat kitai, semua kitai berami begulai.

“Tu mih pengelebih lalu kitai meseti ngetanka nya ungkup ba Sarawak ditu. Tu mih pengelebih ke alai kitai nyadi chunto ba Malaysia.

“Enti kitai nyebut pasal penyerakup, Sarawak mih chunto ke alai kitai ulih idup begulai, idup lantang. Nya kebuah, Kuching diatu digelar mengeri penyerakup,” ku iya.

Iya madah munyi nya ba Pengawa Nyua Pemeri Taun Baru China Ngagai Orang Tuai enggau OKU Sitak Matang Rahman.

Ba pengerami nya, iya ti mega Menteri Idar Kuasa enggau Transfomasyen Ai ti mega Kaban Parlimen Petra Jaya enggau Datin Amar Ruziah Mohd nyuaka pemeri sereta buah limau ngagai 150 penerima nyadi lambang pengelantang enggau berekat serimbai Taun Baru China.

Sama datai, Tuai Sekretari Politik Premier Sarawak ti mega Kaban Kunsil Nengeri (ADUN) Tupong, Dato Fazzrudin Abdul Rahman.

Pengudah pengerami nya, Datuk Amar Fadillah mega limpang ngbas tiga ruang bilik raban bansa China ti kurang penatai pemisi ba sitak Matang nyadi sebagi ari pengawa ngundang rayat sereta berati ke peminta komuniti lokal.

Ba pejalai ngabas nya, iya ukai semina nyua bantu barang diguna, tang mega ngelimpangka awak diri ngaul ruang bilik nya seraya mendingka sada sida lalu meri jamin deka nyaup ngulihka sukung ti diguna. - EDISI UKAS