KUCHING: Pengawa ngaga underpass, nyeruri simpang sereta ngena teknologi lampu trafik pintar entara perambu besai ti benung diperunding dikena mutar penanggul jalai sekut ba Jalai Matang, seraris enggau penyampau entukar enggau ekonomi ba sitak nya ti majak nambah.
Sapit Menteri Besai ti mega Menteri Idar Kuasa enggau Transfomasyen Ai, Datuk Amar Fadillah Yusof madah, perambu nya diatu ba renggat ditungkap Opis Kereja Raya (JKR) sebedau sebarang pemutus digaga.
Ku iya, nyema tungkap nya ditetapka ila, pengawa bukai deka dipejalai nentuka perambu nya ulih dipejalai chara berenggat enggau nemban.
“Pia mega, perambu jalai altenatif mega diperunding, nyengkaum ngaga jalai baru sepanjai urung 2 kilometer ti nyambung Jematan Tun Datuk Amar Dr. Sulaiman Daud ke Jalai Segedup, Maong dikena nyendia mayuh agi pilih jalai ngagai penguna jalai.
"Premier Sarawak benung berati ke perambu tu. Enti dipeda ari Jematan Tun Datuk Amar Dr. Sulaiman, jalai ari selingkut jalai ba dia ulih disambung terus ke jalai nya.
“Tu deka meri mayuh agi pilih jalai enggau nyaup mutar penanggul jalai sekut,” ku iya lebuh dirandau pemberita, ditu kena Hari Enam.
Kaban Parlimen Petra Jaya nya mega nerang ke penyampau entukar ba jalai ti nambah nyeremin ekonomi tumbuh sereta pengulih rayat bisi entukar kediri tang pekara tu meseti diadu manah agi dikena nyeliah penanggul ari sukut infrastruktur ti bisi diatu.
Berebak enggau nya, pengawa ngena teknologi baka Sistem Lampu Trafik Pintar (Smart Traffic Light System) mega diperambu diperunding raban bekuasa lokal nyengkaum Dewan Bandaraya Kuching Utara (DBKU) enggau Majlis Perbandaran Padawan.
Ku iya agi, simpang ti mayuh ba sepanjai jalai nya mega ngujungka penanggul jalai sekut, nya kebuah kerejasama rat agi enggau raban polis trafik meseti ditegap ngambi berati ke gaya jalai nyengkaum engka ngena sistem siti arung ba endur bekaul.
Perambu atur trafik meseti diperati ba semua sukut, ukai semina ari sukut fizikal jalai tang mega ngena teknologi enggau ulah penguna jalai.
“Enti semua raban bejimat enggau ngembuan disiplin, penanggul jalai ulih dikurang,” ku iya.
Iya mega nyemetak madah ke pemesai guna kerejasama meruan entara raban bekuasa lokal, DBKU enggau Majlis Perbandaran Padawan dikena nempa sistem trafik ti berurun, manah agi enggau ngelantang penguna ke pengelantang rayat. - EDISI UKAS
