TUBAU: Program Belepa Begulai Enggau Agensi Perintah Tubau ti diatur ba Uma MU Jaya Paran, Sungai Ayu, ditu kena Hari Lima ukai semina nyadi pelasar ngerapit kaul entara agensi perintah enggau peranak lokal, tang mega mekuh kerejasama komuniti lokal.
Ahli Dewan Negara Senator Michael Mujah Lihan madah, inisiatif baka nya meri peluang ngagai staf perintah, kelebih agi ti gawa ari luar enggau nengeri bukai ngambi mereti ke agi adat asal sereta budaya komuniti lokal, kelebih agi komuniti Orang Ulu ba Tubau.
“Program tu siti inisiatif ti besai reti laban mujur ngempuru agensi perintah begulai enggau komuniti lokal seraya belepa,” ku iya.
Michael ngelalau peranak Uma MU Jaya ngambi terus ngemeran semangat beripai enggau gawa beraban dikena ngemujur genap program ba genturung pendiau.
Iya mega ngemerat pemesai guna nyaga reti enggau budaya tradisyen ngambi ulih ditampung rebak biak dudi hari.
Ba pengawa nya, Michael ngemendar agih belanja penyampau RM20,000 ngagai Komiti Pemansang enggau Pengelikun Genturung Pendiau (JKKK) Uma MU Jaya dikena nembu pengawa numbuh Rumah JKKK ti benung digaga.
Kelimpah ari nya, RM5,000 bela diagih ngagai Sekula Primari (SK) Bukit Balai, Klinik Pengerai Tubau enggau Balai Polis Tubau. - EDISI UKAS
