SARIKEI: Pejalai mayuh projek besai ari Perintah Sarawak terus meri pemaik besai ngagai rayat ba pelilih tu, seraya nentuka pemansang ulih diasai ke serap komuniti.
Sapit Menteri Pengawa Bekebun Bedandang Besai enggau Komoditi ti mega Kaban Parlimen Sarikei Dato’ Sri Huang Tiong Sii madah, inisiatif nya nyeremin pengeran perintah negap pemansang fizikal enggau sosial ba sitak mengeri sereta menua pesisir.
Ku iya, entara projek besai ti benung enggau udah dipejalai nyengkaum Projek Jalai Sarikei–Tanjung Manis sereta Program Transfomasyen Menua Pesisir (RTP) ti ngaul pengawa nyeruri fasiliti sekula, tepikong, gerija, rumah panjai enggau mayuh perengkaguna komuniti.
“Genap projek ti dipejalai ukai semina ngemanah infrastruktur fizikal, tang mega ngerandang awak ngagai komuniti ngambi bagi ba pemansang menua,” ku iya.
Iya madah munyi nya lebuh bejadi Pengerami Ngintu Taun Baru China 2026, ditu kena Hari Lima.
Nambah ke nya, Dato’ Sri Huang meri jamin perintah deka terus ransing mai pemansang nengah mayuh inisiatif strategik ti ulih nambah peluang ekonomi sereta pengelantang sosial rayat.
Ku iya, perati besai nyerangkung pemansang fasiliti pelajar, nyukung aktiviti komuniti sereta nyendia perengkaguna ti nyukung enggau tetangkupka guna peranak.
“Pemansang ti dilanggur enggau inklusif tu ukai semina ulih ngemanah tikas idup rayat tang mega negap semangat beserakup entara komuniti lokal,” terang iya baru. - EDISI UKAS
