Sarawak Negap Pengawa Ngemata Gaya Hari Enti Bisi Satelit Kediri
KUCHING: Sarawak bisi pengulih negap pengawa ngemata gaya hari nyema nengeri tu mujur bisi satelit kediri ba aeroangkasa.
Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, chara ngemata gaya hari konvensional diatu agi mayuh dikena enggau kurang senutuk ari sukut endur, seraya nanggul pengawa besikap sereta perambu ba renggat lokal.
“Reti iya, naka diatu kitai enda ulih agi ngemata gaya hari ti engkeman lalu nya kebuah kitai benung ngelanggur inisiatif baru matau gaya hari.
“Utai ti diguna satelit ti maju agi enggau ulih ngelala terus utai ti deka nyadi ba sesebengkah endur lalu enti nya ulih dikereja, nama pengawa bukai? Kitai meseti bisi satelit kediri empu ba aeroangkasa,” ku iya.
Iya madah munyi nya ba Pengawa Bejadi Sekula Sekondari Antarabansa Yayasan Sarawak (YSISS) ditu kena Hari Enam.
Nambah ke nya, iya mega nerang ke teknologi satelit udah napi ubah besai, nadai agi bepanggai ba satelit konvensional besai, tang ngena teknologi ‘Low Earth Orbit’ (LEO) sereta nanosatelit ti disebut CubeSat.
Ba pengawa ngemansang penau lokal, Perintah Sarawak udah nyendia Fakulti Aeroangkasa di Universiti i-CATS, siti universiti enggi Sarawak nentuka nembiak Sarawak belajar ke penemu aeroangkasa enggau teknologi satelit terus.
“Kitai deka nembiak Sarawak belajar ke penemu aeroangkasa lalu dikearap kitai ulih ngaga CubeSat kediri ngambi dianjung ke aeroangkasa lalu nengah satelit tu, gambar ulih dirikod dikena ngelala utai ti nyadi ba bumi.
“Tu mih ekonomi baru, ke alai kitai nemu dini gunung, tasik enggau darat, seraya meragam struktur bumi sereta pengulih perambu pemansang ba sesebengkah endur,” terang iya.
Sama datai, Menteri Pelajar, Inovasyen enggau Pemansang Penau Sarawak Dato Sri Roland Sagah Wee Inn, Sekretari Perintah Sarawak Datuk Amar Mohamad Abu Bakar Marzuki, Sekretari Pekara Wang Sarawak Dato Sri Dr Wan Lizozman Wan Omar, Sapit Menteri Pelajar, Inovasyen enggau Pemansang Penau Sarawak Datuk Dr Annuar Rapaee, Chairman Kaunsil Direktor Pelajar Antarabansa Yayasan Sarawak Sdn Bhd Datuk Amar Michael Manyin Jawong, Sekretari Besai Sarawak Dato Ahmad Nadzri Mohd Hassan, Direktor Yayasan Sarawak Datu Mohamad Junaidi Mohidin sereta temuai dipebasa bukai. - EDISI UKAS
