YSISS Kuching Nyendia Pelajar Antarabansa Bisi Kualiti, Negap Mobiliti Sosial Nembiak Sarawak
KUCHING: Pengawa numbuh Sekula Sekondari Antarabansa Yayasan Sarawak (YSISS) Kuching nyeremin komitmen meruan Perintah Sarawak nyendia akses pelajar antarabansa bisi kualiti tinggi ngagai nembiak bepenau kelebih agi ari ruang bilik kurang penatai pemisi.
Menteri Pelajar, Inovasyen enggau Pemansang Penau Sarawak, Dato Sri Roland Sagah Wee Inn madah, taja sekula nya belabuh dibuka kena 11 Mac 2024, pengawa bejadi sehari tu bukti inisiatif besai enggau visyen timpuh panjai dikena nempa rebak Sarawak dudi hari ti bepenemu, manah ulah enggau besemekih ba renggat global.
Ku iya, pengawa numbuh YSISS nya bepelasarka prinsip genap anak, nadai ngira tirai juru ruang bilik bisi hak bulih peluang pelajar ti asi enggau bisi kualiti nyadi jalai mobiliti sosial.
“Kami pechaya ke pelajar nya kereban pemadu semitan ungkup sesebengkah ruang bilik ngubah pejalai idup sida enggau nyapai mobiliti sosial ngagai tikas ti manah agi.
“Misyen kami ngaul sida ti bisi pengulih besai tang suntuk ari sukut penau lalu kami naka ulih ngedut takah entara orang kaya enggau miskin sereta entara komuniti mengeri enggau menua pesisir,” ku iya.
Iya madah munyi nya ba Pengawa Bejadi Sekula Sekondari Antarabansa Yayasan Sarawak (YSISS) ti dipenyadi Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg, ditu kena Hari Enam.
Ku iya, YSISS ngemerat pemansang nembiak nengah pengawa ngena Jaku English nyadi batang jaku, bejalaika kurikulum Cambridge ti diaku antarabansa, ngansah pengelandik jeman ke-21 baka runding kritis enggau kreativiti sereta negap nembiak ari raban kurang penatai pemisi ngambi nyadi tuai Sarawak dudi hari.
Pemujur akademik nembiak mega ngemegah lebuh nembiak Pom 1 pas 100 peratus ungkup subjek ‘English as a Second Language’ (ESL), ‘Global Perspectives’ enggau Geografi, seraya nembiak Pom 2 pas ungkup ESL enggau‘Art & Design’ sereta 95 peratus ungkup Sains.
Kelimpah penyulut akademik, nembiak YSISS mega ngemegah nama sekula ba renggat nengeri, nasional enggau antarabansa ba bidang inovasyen, STEM, teknologi enggau lumba nyengkaum menang anugerah ba Konferens Teknologi enggau Inovasyen Antarabansa (TECHON 2025), pekit ngadu mikro nasional sereta pekit chatur enggau olahraga.
Dikena nyukung pengawa belajar chara moden, sekula tu disikap 20 bilik kelas papan pintar, enam makmal sains sereta bantu laptop pechuma ngagai nembiak ari raban B40 dikena ngurangka pengawa bepanggai ngagai bup teks fizikal.
Sama datai, Sekretari Perintah Sarawak Datuk Amar Mohamad Abu Bakar Marzuki, Sekretari Pekara Wang Sarawak Dato Sri Dr Wan Lizozman Wan Omar, Sapit Menteri Pelajar, Inovasyen enggau Pemansang Penau Sarawak Datuk Dr Annuar Rapaee, Chairman Kaunsil Direktor Pelajar Antarabansa Yayasan Sarawak Sdn Bhd Datuk Amar Michael Manyin Jawong, Sekretari Besai Sarawak Dato Ahmad Nadzri Mohd Hassan, Direktor Yayasan Sarawak Datu Mohamad Junaidi Mohidin sereta temuai dipebasa bukai. - EDISI UKAS
