LUBOK ANTU: Perintah Sarawak nengah Unit Pekara Pengarap Bukai (UNIFOR) keran nyaup pemansang rumah sembiang lebuh chek RM300,000 diagih ngagai Gerija St. Philip Lubok Antu ungkup tuju nyeruri begunan gerija.

Chek nya disua Sapit Menteri Dagang Antarabansa, Industri enggau Pengawa Meranak Puku Sarawak (MINTRED) ti mega Kaban Kunsil Nengeri (ADUN) Batang Ai Datuk Dr Malcolm Mussen Lamoh ngagai Revd. Father Afron Gori, Priest-In-Charge Gerija St. Philip Lubok Antu.

Ku iya, agih belanja nya deka dikena bejalaika projek “New Extension” Fasa I Gerija St. Philip Lubok Antu, seraya nambah fasiliti enggau pengelantang raban Kristian besembiang sereta aktiviti ngaul komuniti.

Pengawa nyua chek nya udah diatur ba Palan Servis Komuniti Batang Ai.

Datuk Dr Malcolm nyemetak madah ke inisiatif UNIFOR nyeremin pengeran Perintah Sarawak nentuka pengelantang semua jalai pengarap ba nengeri tu terus dijaga, nipak juluk nempa pengelantang enggau penyerakup pupu bansa enggau jalai pengarap.

Iya mega ngarap bantu nya ulih ngerumban pejalai projek nyeruri gerija sereta meri pemaik timpuh panjai ngagai komuniti lokal.

Sama datai, Pemancha Grang Juben, Penghulu Albert Kelinsing, Kaunsilor Larkin Gol, Kaunsilor Selutan Anggie, sereta raban Parish Church Council (PCC) Gerija St. Philip Lubok Antu.- EDISI UKAS