SERIAN: Pengawa ngaga enggau bejadi begunan baru Tadika Juara Serian nyeremin pengeran mayuh raban negap pelajar tumu nembiak mit nyadi pugu nempa rebak dudi hari.

Pengawa Bejadi enggau Merekat Begunan Baru Tadika Juara Serian udah dipenyadi Uskup Agung Dato Dr. Simon Poh, kena Hari Lima.

Sama datai, Kaban Parlimen Serian Dato’ Sri Richard Riot Jaem, Kaban Kunsil Nengeri (ADUN) Bukit Semuja John Ilus sereta Pegawai Tadbir Opis Residen Bagi Menua Serian Esther Najoh ti nyadi pengari Residen Bagi Menua Serian.

Nitih penerang media ari SSFS Superior General Office, Tadika Juara ti lama udah nyadi pugu pelajar tumu nembiak mit ba Serian diatu udah nyingkang ngagai renggat baru nengah pengawa ngaga begunan tambah dikena nyendia palan belajar ti lantang enggau likun agi.

Pengawa ngaga blok begunan baru tu sebagi ari inisiatif ngumpul belanja enggau selinting sepenyampau RM4.80 juta.

Pemun ngagai projek tu udah diengkah nengah bantu tumu sepenyampau RM1 juta ari Unit Pekara Pengarap Bukai (UNIFOR) ba taun 2021 ti nyadi penyungkak pejalai projek.

Pia mega, Turu Amanah Pengelantang UNIFOR mega nyaup nengah pengawa nyendia jemari sereta kereban dapur nentuka operasyen begunan baru ulih dipejalai lengkas.

Naka diatu, Komiti Ngumpul Belanja projek tu nerima sukung rat ari mensia mayuh lebuh sepenyampau 274 iku udah meri RM1,541,596.

Ari penyampau nya, RM330,000 nya ikrar pelanja khas ungkup 10 bilik kelas, ke alai genap bilik kelas dipelanja pemeri individu nyadi pengawa meranak puku terus ba pemansang pelajar tumu nembiak mit.

Taja pia, projek tu agi begunaka RM3,258,403.99 dikena ngenap selinting belanja RM4,800,000.00, ti deka dikena nangkup ungkus ngaga, pengawa bekaul sereta nyendia barang dalam begunan nya.

Lebuh dirandau pemberita, John Ilus berasai lantang lebuh bantu RM1 juta ari perintah nengah UNIFOR dikemendar taja peminta asal raban Tadika penyampau RM4 juta.

Iya mega berasai tepantup ati meda asil begunan ti lantang enggau lantang endur bala nembiak mit belajar.

“Perambu nyeruri fasiliti deka terus digaga dudi hari, nya kebuah raban Tadika dipinta nganjung perambu sereta peminta bukai dikena ngemanah fasiliti ti bisi diatu ungkup pengelantang bala nembiak,” ku iya.

Mensia mayuh ti deka nyukung tauka ngulihka penerang silik pasal projek ngumpul belanja tu dikelala telefon ngagai Opis Superior General SSFS ba lumur +6016-850 8256. - EDISI UKAS