SIBURAN: Perintah Sarawak terus negap fasiliti ba Pelilih Sibu nengah perambu ngaga Opis Pelilih Siburan ti baru sereta kuarters perintah seraris enggau guna pemansang deras sitak nya.

Sekretari Perintah Sarawak Datuk Amar Mohamad Abu Bakar Marzuki ngatur penemuai gawa ke pelilih nya ngambi ngabas taba perambu ngaga projek nya kena Hari Enam.

Ba sesyen penerang enggau randau ba Bilik Aum Opis Pelilih Siburan, sekeda pekara besai udah dibantai nyengkaum taba ti engkeman, perambu pemansang, fasiliti sukung sereta empas projek ngagai adiministrasyen enggau pengelantang staf perintah ba pelilih nya.

Perambu projek tu engkeman amat berindik ari Pelilih Siburan udah diangkat nyadi pelilih menua ba taun 2021, seraya begunaka fasiliti administrasyen ti menyana agi.

Pengawa ngaga Opis Pelilih Siburan baru disadang nyadi sebagi ari ikon pemansang deras ba Pelilih Siburan, seraris enggau juluk Perintah Sarawak negap servis perintah ba renggat baruh.

Perintah Sarawak keran nentuka genap perambu pemansang dipejalai berurun enggau meri empas ke pemaik rayat sereta pemansang nengeri.

Sama nyempulang iya, Direktor Opis Tanah enggau Survei Sarawak Datu Awang Zamhari Awang Mahmood, Direktor Unit Administrasyen Rusmaliza Mat Darus, Residen Bagi Menua Serian Caroline Cleophas Joseph, Sapit Direktor Opis Kereja Raya Sarawak Sharifah Liz Farawati Wan Omar sereta pegawai bukai. - EDISI UKAS