KUCHING: Pengawa Ngintu Hari Riman Sedunya terus nyadi pelasar beguna meri pengeleda ngagai mensia mayuh senentang pemesai reti sukung ngagai pesakit riman sereta ngingatka mensia mayuh ngelaban penyakit nya tanggungpengawa begulai.

Sapit Menteri Pengerai, Dato Hanifah Hajar Taib madah, riman nya pesakit ti meri empas terus ukai semina ngagai pesakit tang mega ngeruga pengelantang emosyen enggau fizikal ruang bilik sereta komuniti lalu begunaka sukung rat ari semua raban.

“Sukung moral, kasih sayau enggau sampi ari kita nya pengering ti berega ba sida.

“Pesakit riman meseti diberi sukung enggau peransang berubat dikena ngelaban penyakit tu.

“Mensia mayuh meseti nukar asai takut ngagai riman tu enggau pengawa mereti sereta sukung, kasih sayau enggau pengeliat ati ruang bilik ari sukut emosyen enggau fizikal maya ngubat riman,” ku iya.

Iya madah munyi nya lebuh bejaku ba Pengawa Bejadi Ngidupka Lampu Jematan Darul Hana, ai engkeching sereta Kompleks Kunsil Nengeri (DUN) Sarawak serimbai Hari Riman Sedunya 2026 ba Tebing Ai Sarawak, kena Hari Enam.

Ngenang silik, Dato Hanifah nyemetak madah ke statistik nunjukka kes riman nambah belama tang mayuh pesakit agi ditemu ba renggat nyau laun ketegal kurang pengeleda sereta laun beperesa pengerai.

Berebak enggau nya, iya nyemetak madah ke pemesai reti beperesa pengerai belebuh dikena ngelala penyakit tumu agi seraya nambah peluang berubat ti nemban agi.

Iya mega meri terima kasih ngagai kompeni ukai dikuasa perintah (NGO) kelebih agi Sarawak Cancer Association and Awareness Network (SCAN) nengah adivokasyen enggau program outreach ti udah diatur dikena narak pengeleda mensia mayuh pasal riman.

Pengerami Ngintu Hari Riman Sedunya 2026 mai sulu jaku ‘United by Unique’ti ngemerat pemesai reti penyerakup enggau sukung moral ngagai semua individu ti benung ngelaban riman.

Pengawa ngidupka lampu ba struktur ikonik nengeri nya nyadi lambang solidariti rayat Sarawak dikena nyukung pengawa narak pengeleda ngagai mensia mayuh bekaul igi penyakit nya.

Sama datai, Penyanding Penemu SCAN Datin Dayang Mariani Abang Zain, Presiden Society of Cancer Advocacy & Awareness Kuching Chris Cheng sereta Tuai Unit Pemansang Penerang Dewan Bandaraya Kuching Utara (DBKU) Sharul Sulaiman ti ngari ke Direktor DBKU. - EDISI UKAS