BAU: Program “She Creates, She Sustains” nyadi pelasar besai narak kreativiti sereta pengeleda ngagai pemeruan entara penyereta, kelebih agi ba bidang dagang kraf.

Sapit Menteri Pengangkut Sarawak ti mega Kaban Kunsil Nengeri (ADUN) Tasik Biru Datuk Henry Harry Jinep madah, bala penyereta ukai semina diajar nyadi kreatif, tang mega diajar nentuka asil tengkebang sida ulih beretan enggau mansang ba timpuh panjai.

"Program baka tu ulih meri semangat sereta ngansah runding bala penyereta ngerembaika pengulih diri, kelebih agi ba bidang dagang.

“Inisiatif tu berati ke kreativiti enggau pemeruan tu dipeda ulih nempa pedagang ti besemekih agi enggau berati ke peminta makit kemaya hari,” ku iya lebuh bejaku ba program nya, kena Hari Lima.

Program ti udah diatur pengelama tiga hari nya ngemata bala penyereta dibagi ngagai tim dikena ngasilka produk bepelasarka "Sustainability Material".

Program tu ngembuan tuju nempa pedagang kraf ti ulih nambah penatai pemisi meruan nengah ngasilka produk pesaka asal ti ngena kereban asal nipak pengawa nyaga rampa menua.

Ku Datuk Henry, program baka tu bukti mayuh inisiatif enggau penemu berega ulih ditempa lebuh kreativiti dikena manah ngena kereban dikemisi ngelingi kitai.

“Inisiatif tu ukai semina ulih ngasilka produk ti nyelai enggau bisi identiti kediri empu, tang mega bisi pengulih nyadi sebagi ari pematak besai ba makit sereta aset berega nempa dagang ti beretan enggau meruai dudi hari,” ku iya. - EDISI UKAS