LUBOK ANTU: Projek pemansang infrastruktur besai ba Pelilih Lubok Antu diatu chakah dipejalai enggau meri perati ngaga jalai enggau fasiliti pengerai dikena nambah aksesibiliti enggau pengelantang komuniti lokal.
Sesyen Penerang Projek Pemansang Pelilih Lubok Antu udah dipenyadi Sapit Menteri Dagang Antarabansa, Industri enggau Pengawa Meranak Puku ti mega Kaban Kunsil Nengeri (ADUN) Batang Ai, Datuk Dr Malcolm Mussen Lamoh tii diatur ba Bilik Aum, Opis Pelilih Lubok Antu, kena Hari Lima.
Entara projek ti dipejalai iya nya Projek Jalai Sebeliau–Bilararap ngaul ngaga jalai sepanjai 35.6 kilometer beungkus RM215 juta.
Projek tu ngena spesifikasyen JKR Kelas R1 lalu disadang tembu ba timpuh 36 bulan, belabuh ari 31 Mac 2025 nyentuk 30 Mac 2028, nengah pengawa meresa timpuh tembu diselinting kena 8 Oktober 2028.
Pia mega, Projek Jalai Nuju Mayuh Genturung Pendiau ba sepanjai Ulu Batang Ai, Lubok Antu benung dipejalai nengah pengawa ngaga jalai sepanjai urung 28 kilometer bepun ari Wong Panjai nyentuk Rumah George, Tapang Pungga.
Nambah ke nya, perambu ngaga enggau nembuka laluh kereja Klinik Pengerai (Kategori 4) ba Lot 900, Bukit Besai Land District, Jalan JKR Quarters, Off Jalan Lubok Antu mega dikerandau ngambi ngemanah fasiliti pengerai peranak.
Projek tu ukai semina nambah aksesibiliti enggau pengelikun jalai, tang mega nyeremin pengeran perintah ngedut takah pemansang entara sitak mengeri enggau menua pesisir, kelebih agi ba ulu Lubok Antu enggau Ulu Batang Ai. -EDISI UKAS
