KUCHING: Kuching City FC (KCFC) nampung rentak nyulut ba kelang diri empu pengudah sekali da nurai pemujur besai pengudah mujur ‘ngalahka’ Negeri Sembilan FC (NSFC) ba Liga Super di Stadium Negeri, malam Hari Enam.

Gol keterubah penyerang ti majak nempa nama ba tim KCFC, Gabriel Nistelrooy, ba minit ke-11 nyadi peransang The City Boys angkat lebuh iya jampat ngerebut peluang ke pengilap tim sepiak, Muhammad Amirul Adli, sebedau masuk ke bol tama ke pintu gol.

Gol nya ngujungka tuai rumah ngenulu 1-0 ba main setengan renggat keterubah, seraya meri pengandal ngagai anembiak Aidil Sharin Sahak ti terus nguasa gaya bemain enggau chara nyerang ti ngasuh pemain sepiak nangi.

Taja ayan enggau gaya nyerang 3-5-2 keterubah bemain, KCFC mengkang nyulut enggau bedisiplin pengudah mujur nyeliah sebarang gol ari tim sepiak.

Pengelebih nyata pulai ngagai KCFC pengudah berapa kali pemain import, Yuki Tanigawa nguji nyipak gol ngenyit ba minit ke-15 ti semina teginsit mimit kelimpah belanda sereta gaya sipak Petrus Shitembi ti mujur ditagang Ronald Ngah Wanja ba minit ke-25.

Yuki sekali da nyau deka ngasuh penyukung tuai rumah manjung gaga nengah siti da nguji nyipak bol ari jauh, tang nasip enda nyangkung iya lebuh bol puntan tama ke pintu gol.

Datai ba renggat kedua, KCFC terus ngansak nyipak gol ke kubu NSFC lebuh Muhammad Ramadhan nguji ba minit ke-46 ngujungka penyaga gol, Muhammad Azri Abdul Ghani, bebendar nyilat enggau nagang bol ari tama ke pintu gol.

Pengawa nya mansutka asil ba minit ke-66 lebuh sipak Ramadhan ke dalam kutak penalti puntan ditagang dua pemain NSFC, seraya meri awak ngagai‘Pak Ngah’nyipak gol kedua KCFC.

Pemujur nya ngangkatka KCFC ngagai penuduk kedua Liga Super, niki dua anak tangga ari penuduk keempat sebedau tu seraya negapka penuduk sida musin tu. - EDISI UKAS