KUCHING: Penatai Premier Sarawak Datuk Patinggi Tan Sri (Dr) Abang Abdul Rahman Zohari Tun Datuk Abang Openg ngemata pengawa bemain Kuching City FC (KCFC) ngelaban Negeri Sembilan FC di Stadium Negeri malam tadi nunjukka kelai manah ngagai pemansang bol Sarawak.

Tuai Jurulatih KCFC Aidil Sharin Sahak madah, penatai Premier keterubah pengudah lebih 10 taun meri besai reti, taja tim enda dipadah tumu bekaul penatai iya.

Ku iya agi, pemujur ngelaban tim ‘Hoben Jang Hoben’nya betambah manis ngagai penatai iya ti nyukung pengawa nya.

“Tang lebuh kita madah ke Premier datai meri sukung ngagai kelab, aku ngasai ke tu kelai ti manah.

“Ukai semina ungkup Kuching City, tang mega ungkup selampur Sarawak,” ku iya ba aum pemberita pengudah pekit nya.

Ba pekit nya, KCFC mujur ngalahka Negeri Sembilan FC 2-0 asil sipak gol Gabriel Nistelrooy enggau Ngah Wanja.

Aidil mega madah ke pemujur ba pekit nya dikearap ulih ngasuh Premier Sarawak gaga sereta nyendia mayuh agi peluang sukung ngagai kelab dudi hari.

Nambah ke nya, iya madah ke pengirau ngagai kualiti padang ti didawa nyadi kebuah sekeda pemain bakal.

Ku iya agi, Daniel Amier disadang diketu nyentuk dua bulan bepelasarka sanding penemu lutur ketegal gaya padang.

Pia mega, Gabriel bakal hamstring seraya Ronald Ngah bakal ba buku ali ti dipelaba bepun ari gaya padang ti kering enggau enda ba tikas pemadu manah.

“Nya kebuah, pekara tu meseti diperati enggau dikemanah lalu aku ngarapka gaya padang tu deka manah agi dudi hari,” ku iya. - EDISI UKAS

Pemberita : Ahmad Daniel Faiz