Premier Sarawak Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, pemansang tu ngaul dua komponen iya nya endur ngelingi taman botani disikap biodiversiti baka tanam utai tanam lokal.
Seraya, komponen kedua deka nyambung jalai pesaka asal ti bepun ari Muzium Mayau Dewan Bandaraya Kuching Utara (DBKU) nyentuk Taman Reservoir.
“Tu deka meri peluang ngagai rayat ditu enggau temuai kitai ngasai ke pengelebih dikemisi ba Sarawak.
“Nya kebuah, komponen tu deka disikap utai tanam baka buluh, pun pisang sereta pun kayu tropikal.
“Arap ke tu meri pemeruan mengeri baruh karbon nipak inisiatif mengeri pintar,” ku iya.
Iya madah munyi nya lebuh dirandau pemberita pengudah Pengawa 'Walk For Health' Begulai Enggau Premier Sarawak di Taman Botani Sarawak, Petra Jaya, kena Hari Minggu.
Premier Sarawak mega madah, pemansang taman botani tu deka ngangkatka mengeri Kuching nyadi indu mengeri ti disikap nyadi mengeri baruh karbon enggau mengeri pintar.
Terang iya, projek pemansang tu udah dipejalai lalu pengawa pagi tu mega berati ke endur ngelingi taman botani nya seraya berati ke sukut ngemanah taman nya.
Ku iya, sekeda badan bekanun baka Palan Pemansik Biodiversiti enggau Opis Kampung Sarawak deka nentuka taman botani tu nyadi ‘anak iru’ dikena ngadu endur nya.
Dulu ari nya, Premier Sarawak begulai enggau temuai dipebasa bukai 'brisk walk' sepanjai 2.5 kilometer di Taman Botani nya begulai enggau orang gawa Perintah.
Iya mega mendingka penerang bekaul pemansang ti deka dipejalai ba endur Taman Botani nya nyengkaum projek nyambung jalai pesaka asal ti dikenatai Direktor DBKU Sr Ramzi Abdullah.
Sama datai, anak Premier Sarawak Dayang Norjihan Datuk Patinggi Tan Sri (Dr) Abang Abdul Rahman Zohari, dua Sapit Premier Sarawak Datuk Amar Douglas Uggah Embas enggau Datuk Amar Profesor Dr Sim Kui Hian, Menteri Dagang Temuai, Industri Kreatif enggau Seni Pemerindang Sarawak Dato Sri Abdul Karim Rahman Hamzah, Menteri Industri Pemakai, Komoditi enggau Pemansang Kandang Menua Sarawak Dato Sri Dr Stephen Rundi Utom, Sekretari Perintah Sarawak Datuk Amar Mohamad Abu Bakar Marzuki, bala Sapit Menteri Kabinet Sarawak, tuai opis sereta temuai dipebasa bukai. - EDISI UKAS
Pemberita : Ahmad Daniel Faiz
Gambar: Hazrin Sunaini
