Sarawak Keran Matak Pemerindang Antarabansa Nengah Palan Seni Pemerindang Betikas Dunya
KUCHING: Sarawak bisi pengulih matak mayuh pemerindang seni antarabansa berindik ari aktiviti seni pemerindang ti diatur ba nengeri tu nambah.
Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, siti orkestra ari Jepun kemari ditimbal manah bukti komuniti chukup rindu ke seni pemerindang betikas antarabansa.
“Tu mai reti kitai ulih matak pemerindang antarabansa pengudah fasiliti seni pemerindang kitai tembu. Tu nyengkaum teater enggau muzikal.
Iya madah munyi nya lebuh dirandau pemberita pengudah Pengawa 'Walk For Health' Begulai Enggau Premier Sarawak di Taman Botani Sarawak, Petra Jaya, kena Hari Minggu.
Anime, Komik enggau Bemain (ACG) 2026 diatur The Band Lab udah diatur ba Stadium Perpaduan Sarawak kemari mandangka artis Jepun baka AvantGardey ti mai bala pengusung rindang ninga tebah anime tebilang dunya.
Nambah ke nya, Premier Sarawak nyemetak madah, pemansang fasiliti ti genap enggau moden nya elemen beguna dikena nyukung industri seni pemerindang.
Berebak enggau nya, ku iya, Sarawak numbuh Palan Seni Pemerindang nyadi entara infrastruktur pemadu moden ba rantau tu nengah Royal Albert Hall di London nyadi model.
Sama datai, anak Premier Sarawak Dayang Norjihan Datuk Patinggi Tan Sri (Dr) Abang Abdul Rahman Zohari, dua Sapit Premier Sarawak Datuk Amar Douglas Uggah Embas enggau Datuk Amar Profesor Dr Sim Kui Hian, Menteri Dagang Temuai, Industri Kreatif enggau Seni Pemerindang Sarawak Dato Sri Abdul Karim Rahman Hamzah, Menteri Industri Pemakai, Komoditi enggau Pemansang Kandang Menua Sarawak Dato Sri Dr Stephen Rundi Utom, Sekretari Perintah Sarawak Datuk Amar Mohamad Abu Bakar Marzuki, bala Sapit Menteri Kabinet Sarawak, tuai opis sereta temuai dipebasa bukai. - EDISI UKAS
Pemberita : Ahmad Daniel Faiz
Gambar: Hazrin Sunaini
