KUCHING: AirBorneo sedia berandau enggau Perintah Besai nyendia waran penerebai ngagai orang gawa perintah ba selampur Malaysia.
Premier Sarawak Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, sida udah bisi perambu ngadu pekara nya.
“Tu nadai nanggul lalu kitai ulih berandau (begulai enggau Perintah Besai) lalu udah bisi perambu ngagai pekara nya,” ku iya lebuh dirandau pemberita pengudah Pengawa 'Walk For Health' Begulai Enggau Premier Sarawak di Taman Botani Sarawak, Petra Jaya, kena Hari Minggu.
Premier Sarawak mega madah, semua tu deka diperati pengudah operasyen jet belabuh disadang pengudah bulan Julai tu.
Ba pekara bekaul, ku iya, operasyen penerebai jet mega deka dikena nyambung Kuching ngagai penerebai menua luar nyengkaum Jepun, Korea enggau menua ASEAN.
Ku iya, nya nyengkaum penerebai ba Pulau Borneo baka Balikpapan, Samarinda enggau Pontianak ti deka ngena bilunATR ti deka diubah konfigurasyen ngambi lantang agi berindik ari takah penerebai nya enda jauh.
Ku iya agi, tu deka betambah nengah pengawa nambah dagang temuai perubat ti majak nambah.
“Tu nyengkaum Gleneagles di Batu Lintang, sereta siti hospital di NorthBank, Tabuan lalu siti da iya nya nangkir Borneo Medical Centre.
“Semua tu deka nambahka agi pengulih dagang temuai perubat ba Sarawak,” ku iya.
Sama datai, anak Premier Sarawak Dayang Norjihan Datuk Patinggi Tan Sri (Dr) Abang Abdul Rahman Zohari, dua Sapit Premier Sarawak Datuk Amar Douglas Uggah Embas enggau Datuk Amar Profesor Dr Sim Kui Hian, Menteri Dagang Temuai, Industri Kreatif enggau Seni Pemerindang Sarawak Dato Sri Abdul Karim Rahman Hamzah, Menteri Industri Pemakai, Komoditi enggau Pemansang Kandang Menua Sarawak Dato Sri Dr Stephen Rundi Utom, Sekretari Perintah Sarawak Datuk Amar Mohamad Abu Bakar Marzuki, bala Sapit Menteri Kabinet Sarawak, tuai opis sereta temuai dipebasa bukai. - EDISI UKAS
Pemberita : Ahmad Daniel Faiz
Gambar: Hazrin Sunaini
