TATAU: Perintah Sarawak majak ransing negap pemansang menua pesisir nengah pejalai Projek Transformasyen Menua Pesisir (RTP) lebuh sekeda projek tembu ungkup DUN N60 Kakus udah diserah sereta diabas.

Pengawa ngabas taba kena Hari Minggu tu tadi betuai ke Menteri ba Opis Premier Sarawak, Dato Sri John Sikie Tayai, mungkur sekeda projek besai ti udah tembu digaga ba kandang ngelingi Tatau, lalu mandangka penyiru perintah nengeri ba perengkaguna pemun enggau pengelantang rayat menua pesisir.

Entara projek ke dilawa iya nya Projek Ngaga Baru Jematan Rumah Enjan Gos, Tatau, ti deka meri pemaik nyengala ngagai peranak menua lebih agi ngemanah jalai, pengelikun sereta pemujur pengawa mindah besehari komuniti rumah panjai.

Nangkan nya pengawa ngabas nyengkaum Projek Nyeruri Jalai Rumah Jelian Guru, Muput, Tatau, ti udah tembu lalu dipeda ullih nyamin pengelantang sereta pengelikun penguna jalai, kelimpah ngemuntangka pejalai peranak menua ba endur ngelingi nya.

Raban nya mega ngabas Projek Entepan Entukar Opis Pelilih Tatau ti udah tembu digaga dikena ngemanah perengkaguna mensia mayuh sereta pengelantang bala mayuh enggau atur ba opis nya.

Sama nyempulang pengawa ngabas taba projek nya, Pegawai Pelilih Tatau, Calvin Ligong sereta pengari ari Opis Kereja Raya (JKR) Bagi Menua Bintulu, Joseph Tyran.-EDISI UKAS