KUCHING: Pengawa ngatur Lumba Sarawak (SUKSAR) 2026 kali keempat deka diatur enggau macham inisiatif baru lebih agi ari pekara ngatur pekit enggau pemansang tikas pemanah atlit, lalu ngenegap tanggungpengawa iya nyadi pelasar strategik nempa atlit pelapis Sarawak ba renggat nasional enggau antarabansa.
Sapit Menteri Nembiak, Lumba enggau Pemansang Orang Dagang Sarawak, Datuk Gerald Rentap Jabu madah, SUKSAR 2026 ngemanah pejalai sistem ngatur pekit begulai nyerangkung ngerejister atlit, logistik, taga pekit sereta data tikas atlit, lalu ngulihka raban pengatur sereta opis menteri merambu program latih ti spesifik sereta mujur seriris enggau pemesai guna pemansang lumba nengeri.
“Kitai nempa siti sistem begulai ti nyerangkung pengawa ngerijister atlit, ungkup guna enggau logistik, lalu ngulihka raban pengatur enggau opis menteri ngembuan data dikena merambu latih ti spesifik agi.
“Chara tu mega mantu perambu volunteer, taga pekit sereta pengawa ngatur pemutus ti berurun agi, kelimpah disaup tim betikas tinggi ti merati pengawa ngintu pengelantang, tikas fizikal, mental sereta ngintu pengerai atlit ke bakal,” ku iya.
Iya madah munyi nya ba program randau Juh Randau ke ditabur Unit Komunikasi Awam Sarawak (UKAS) ti diatur di Studio UKAS ditu, Hari Satu.
Kelimpah ari nya, ku iya, SUKSAR 2026 mega merati ke pekara ngintu pengelantang enggau pengelikun atlit nengah kaul tim betikas tinggi ti matau tikas fizikal, runding sereta pengawa ngubat bakal sepemanjai pekit diatur, lebih agi ngaul atlit baru 18 taun.
Berebak enggau nya, pengawa ngatur pekit tu mega meri peluang kaul komuniti menua nyadi volunteer enggau nyendia servis bukai, lalu meri peneleba sereta penemu pengawa ngatur lumba betikas nengeri ngagai rayat menua.
Pekit deka diatur ari 5 ngagai 8 Februari tu, pengerami dua taun sekali tu deka mungkur 11 bansa lumba enggau semak 900 atlit ngambi bagi sereta lebih 300 pegawai teknikal ari selampur nengeri, ngaul nalan besai di Betong, Sri Aman enggau Lubok Antu.
Achara lumba ti deka dipekit ba empat palan nya nyengkaum ping pong, sofbol, tinju, petanque, basketbol, angkat berat, ensikal, netball, taekwando, sepak takraw enggau karate.
Datuk Gerald mega nyemetak madah, SUKSAR ukai semina nyadi nalan pekit, tang nyadi pugu nempa atlit Sarawak nyadi berurun dikena besikap napi pengerami SUKMA enggau pekit ke besai agi dudi hari.
Pengerami bejadi SUKSAR 2026 disadang diatur kena 4 Februari 2026 di Balai Lumba Tan Sri Datuk Kalang Amar Stephen Kalong Ningkan, Betong lalu deka dipenyadi Sapit Premier Sarawak, Datuk Amar Douglas Uggah Embas.
Lalu pengerami nutup kena 8 Februari 2026 di Stadium Tertutup, Kompleks Lumba Sri Aman deka dipenyadi Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg.
Program nya dipelaba meri pemaik positif ngagai pemansang lumba, kaul nembiak sereta ngeranchak aktiviti ekonomi menua nengah sektor dagang mit, endur diau, pengangkut enggau servis bukai ba sitak bekaul, ku iya. - EDISI UKAS
