SPAOH: Program randau entara perintah, kompeni enggau komuniti menua majak dipejalai lebuh siti randau khas diatur ti meri penemu komprehensif ngagai rayat bekaul langgur pemansang tanah endur nanam sawit ba kandang Ulu Paku enggau kandang ngelingi.
Randau begulai enggau Sapit Premier Sarawak, Datuk Amar Douglas Uggah Embas bekaul langgur ngereja tanah ungkup nanam sawit mujur diatur ba Rumah Panjai Mendit, Penom, Ulu Paku, ditu, Hari Dua.
Program nya udah ngempuru urung 100 iku penyereta baka bala tuai rumah sereta pengari rumah panjai ari kandang Ulu Paku, Spaoh enggau Ulu Rimbas, Debak.
Tuju randau nya dikena meri awak ngagai bala tuai genturung pendiau madah enggau meri timbal penemu sereta bulih penerang terus bekaul langgur pemansang tanah ke dilanggur dikereja kompeni TA ANN.
Datuk Amar Douglas Uggah ti mega Kaban Kunsil Nengeri (ADUN) Bukit Saban nerang silik bekaul pejalai projek nya nyengkaum pekara perambu, chara ngemansang sereta pemaik timpuh panjai ti deka diasai peranak menua.
Iya mega madah, tetiap langgur pemansang deka ngira penemu ari komuniti menua sereta dipejalai seriris enggau atur ke bisi dikena nentuka pemesai reti enggau pengelantang rayat majak dijaga.
Sama datai, Kaban Parlimen Betong, Dato Dr. Richard Rapu, pengari Opis Tanah enggau Survei Sarawak sereta kaban Komiti Pemansang enggau Pengelikun Genturung Pendiau (JKKK) rumah panjai.-EDISI UKAS
