KUCHING: Yang di-Pertua Negeri Sarawak, Tun Pehin Sri Dr. Wan Junaidi Tuanku Jaafar nerima penemuai basa ari deligit Kaunsil Islam Sarawak (MIS) ti betuai ke Sapit Menteri ba Opis Premier Sarawak (Penyeraris Projek Agensi Pemansang Kandang Menua, Kaunsil Mengeri Kuching Utara enggau Pekara Islam), Datuk Dr. Abdul Rahman Junaidi ba rumah iya, ditu, Hari Dua.

Sama datai ba penemuai basa nya, Yang di-Pertua Kaunsil Islam Sarawak, Datuk Misnu Taha, Tuai Hakim Syarie Opis Hakim Syariah Sarawak Datu Awang Suhaili Ledi, Menijar Besai Tabung Baitulmal Sarawak, Datu Abang Mohd Shibli Abang Mohd Nailie, Direktor Opis Pengarap Islam Sarawak ti mega Sekretari MIS, Sahibus Siyadah Ustaz Mual Suaud, Direktor Opis Mufti Sarawak Sahibus Siyadah Ustaz Ahmad Sukarno Saini, sereta raban tuai kanan enggau pegawai Kaunsil Islam Sarawak enggau opis perintah bekaul.

Tuju penemuai basa nya diatur nyadi ke pelasar dikena ngenegap kaul kerejasama entara Kaunsil Islam Sarawak enggau institusyen Yang di-Pertua Negeri kelimpah meri awak besilih penemu bekaul pekara atur enggau pemansang Islam di Sarawak.

Nengah penemuai tu, Tun Pehin Sri Dr Wan Junaidi udah diberi penerang komprehensif senentang tuju strategik, tanggungpengawa Kaunsil Islam Sarawak nyerangkung Opis Perintah enggau Agensi Islam Sarawak nyengkaum Opis Pengarap Islam Sarawak, Opis Mufti Sarawak, Opis Hakim Syariah Sarawak enggau Tabung Baitulmal Sarawak, sereta inisiatif maya hari tu ti dilangkar dikena nentuka atur pekara Islam digaga enggau chara ti berurun, inklusif enggau bepelasarka undang-undang ke bisi.

Maya penemuai basa tu mega meri peluang pemadu manah ngagai raban MIS dikena ngulihka sanding penemu sereta lalau ari Yang di-Pertua Negeri Sarawak nyadi medium nyeraris polisi enggau tuju, lebih agi ba nentuka pejalai program, pemadah fatwa sereta atur institusyen Islam ba nengeri tu seriris enggau pemesai reti ngagai raban Islam enggau pengelantang rayat pupu bansa enggau jalai pengarap di Sarawak.-EDISI UKAS

Gambar: Astana Sarawak